پۆلیسی هەولێر ئاشكرایكرد، هەڵمەتی سێیەمی دەستگیركردنی سواڵكەرەكانی ناو هەولێری ئەنجامداوە و ژمارەیەكی زۆری دەستەبەسەركردوە. تەئكیدیشدەكاتەوە هەڵمەتەكە لە سەرجەم شوێن و شەقامەكانی ناوشار و دەرەوەی شاریش بەردەوام دەبێت.
بەڕێوەبەرایەتی پۆلیسی پارێزگای هەولێر بڵاویكردوەتەوە، بەشی پۆلیسی رێككاری لەسەر شەقام و شوێنە گشتییەكان و ناوبازاڕ و ترافیكلایتەكان، هەڵمەتی سێیەمیان دەستپێكردو ژمارەیەكی زۆر سواڵكەریان دەستگیركرد، كە لەو شوێنانە داوای پارە و خێریان لە خەڵك دەكرد و ببونە مایەی بێزاری بۆ هاووڵاتیان.
پۆلیسی هەولێر ئەوەشی رونكردوەتەوە، بەشێكی زۆر لە سواڵكەرەكان بۆ راكێشانی سەرنجی خەڵك، منداڵەكانیان لەسەر عەرەبانە دادەنێن تا هاووڵاتیان خێریان پێ بكەن، لەكاتێكدا منداڵەكانیان هیچ كێشەیەكی تەندروستییان نییە.
بەڕێوەبەرایەتی پۆلیسی هەولێر دوپاتیدەكاتەوە سواڵكردن دیاردەیەكی ناشیرینە و سیمای شار دەگۆڕێت بۆیە پێویستە بنبڕ بكرێت، بۆ ئەو مەبەستەش هەڵمەتەكە لە سەرجەم شوێن و شەقامەكانی ناوشار و دەرەوەی شاریش بەردەوام دەبێت، هەموو سواڵكەرەكانیش بەپێی مادەی 390 لە یاسای سزادان لە زینداندا راگیراون.
