بەدر زیادی ئەندامی لیژنەی ئاسایش و بەرگریی پەرلەمانی عیراق دەڵێت، هەڵوێستی هەرێمی كوردستان شەرمنانەیە بەرانبەر دەستدرێژیە بەردەوامەكانی توركیا. دەشڵێت “هێزەكانی پێشمەرگە بۆخۆیان تەماشای بۆردومانەكانی سوپای توركیا دەكەن و داوای خەرجكردنی موچەكانیشیان دەكرێت”.
بەدر زیادی لە بەیاننامەیەكدا بڵاویكردوەتەوە، هەرێمی كوردستان هێڵی یەكەمی بەرپەرچدانەوەی دەستدرێژییە بەردەوامەكانی توركیایە بۆسەر سەروەریی خاكی عیراق.
ئاماژەی بەوەشداوە، هێزەكانی پێشمەرگە تەنها رۆڵی تەماشاكەرێك دەبینن بەرانبەر فڕۆكەكانی توركیا و بۆردومانەكانی خاكی عیراق، بەڵام حكومەتی هەرێم، حكومەتی ناوەند تۆمەتباردەكات و داوای خەرجكردنی موچەی هێزەكانی پێشمەرگە دەكات، كە هیچ جوڵەیەكیان نەكردوە دژی پێشێلكارییەكان و بێدەنگن.
ئەندامەكەی لیژنەی ئاسایش و بەرگریی پەرلەمانی عیراق باسی لەوەشكردوە، لە دانیشتنی داهاتوی پەرلەمانی عیراقدا گفتوگۆ لەسەر دۆسێی بەردەوامیی دەستدرێژییەكانی توركیا بۆسەر سەروەریی عیراق دەكرێت.
