گۆڕان: كێ بەڵگەی بازرگانیكردنی بزوتنەوەكەمانی لایە با بیخاتەڕو

بزوتنەوەی گۆڕان رەتیدەكاتەوە كۆمپانیای بازرگانیی هەبێت و بازرگانی لە دەروازەكان و دەرەوەی دەروازەكان بكات. دەشڵێت، ئەوانەی خۆیان رۆژانە سەرقاڵی بەدەستهێنانی داهاتی نایاسایین لە مەرزەكان، “درۆی ژەهراوی بڵاودەكەنەوە”، هەڕەشەی گرتنە بەری رێكاری یاسایش دەكەن.
بزوتنەوەی گۆڕان لە رونكردنەوەیەكدا ئاماژەی بەوەكردوە “ماوەیەكە لێرە و لەوێ، هەندێك لایەن و كەس و ماڵپەڕ، لە چوارچێوەی شەڕی دەروونیی دژ بە بزوتنەوەی گۆڕان و گۆڕانخوازان، پڕوپاگەندە و درۆی ژەهراوی بڵاودەكەنەوە، گوایە گۆڕان كۆمپانیای بازرگانی هەیە و لە دەروازەكان كار دەكات. ئەو لایەنانە، كە خۆیان رۆژانە سەرقاڵی بەدەستهێنانی نایاساییانەی داهاتن لە دەروازەكان، بۆ پەردەپۆشكردنی ئەو كارە دزێوە و دزیكردن لە داهاتی گشتی و قوتی هاونیشتمانیان، لە رێگەی ئۆرگانەكانیان و ئەو كەسانەی خزاونەتە نێو بازنەی بەرژەوەندییەكانیان، دەیانەوێت بزوتنەوەی گۆڕان وەك خۆیان وێنا بكەن”.
گۆڕان دووپاتیشی دەكاتەوە، كە بزوتنەوەكە هیچ كۆمپانیایەكی بازرگانی نییە، هیچ كارێكی بازرگانی لە دەروازەكان و دەرەوەی دەروازەكان ناكات، بە ئەركی حكومەت و لایەنە پەیوەندیدارەكانیشی دەزانێت، هەموو ئیجرائاتێكی یاسایی و ئسوڵی پێویست بگرنە بەر بۆ كۆتاییهێنان بەو كارە نایاسایی و دزیكردنانەی لە مەرزەكان و قۆرخكاریی بازاڕ و برەودان بە كۆمپانیای حزبی هەن.
لە كۆتایی رونكردنەوەكەیدا گۆڕان داوای لە هەر كەس و لایەنێك كردووە، ئەگەر هەر جۆرە زانیاری و دۆكیومێنتێكیان لەسەر بوونی كاری بازرگانی بەناوی گۆڕانەوە هەیە، پێشكەش بە رای گشتی و لایەنە پەیوەندیدارەكانی بكەن، “بەپێچەوانەوە، قسەفڕێدان بەمەبەستی ناوزڕاندن و تۆمەتهەڵبەستن، بۆ پەردەپۆشكردنی راستییەكان و ونبوونی كەیسەكە و تەڕ و وشك پێكەوە سوتاندن، ناچارمان دەكات پەنا بۆ رێكاری یاسایی ببەین”.

هەواڵی دواتر

نرخی بەرمیلێک نەوت گەیشتە 111 دۆلار و 43 سەنت

دوێنێ نرخی بەرمیلێک نەوت بۆ 112 دۆلار و 31 سەنت بەرزبووەوە و رۆژەکەی بە 111 دۆلار و 43 سەنت، تەواو …

وەڵامێک بنووسە

پۆستی ئەلکترۆنیکەت بڵاو ناکرێتەوە .