گۆڤاری “فۆربس”ی ئەمریكی ئاشكرایكرد، دەسەڵاتدارانی عیراق دەیانەوێت فڕۆكەی “Su-57″ی روسی ناسراو بە “شەبەح” بكڕن، بەڵام هەنگاوێكی لەو شێوەیە روبەڕوی سزاكانی ئەمریكایان دەكاتەوە.
گۆڤاری “فۆربس” بڵاویكردوەتەوە، دەزگا راگەیاندنەكانی روسیا لە زاری پشكنەرێكی وەزارەتی بەرگریی عیراقەوە بڵاویانكردوەتەوە، بەغدا نیازی ئەوەی هەیە فڕۆكەی جۆری Su-57ی روسی بكڕێت، كە تائێستاش لە روسیا تەنها نمونەكەی دروستكراوە.
رونیشكراوەتەوە، ئەو دەنگۆیانە راست بن دەبێتە جێی پرسیار بە لەبەرچاوگرتنی لایەنی ئابوری و سەربازی، چونكە كڕینی ئەو جۆرە فڕۆكەیە لەكاتێكدایە عیراق قەیرانی ئابوری هەیە، هەروەها گرنگیدان بەو جۆرە فڕۆكەیە لە گرنگیدان بە فڕۆكەی F-16 سەختترە، چونكە تیمی تەكنیكی و راوێژكاریی روسی بونی نییە، سەرەڕای ئەوەش راهێنانی فڕۆكەوانە عیراقییەكان لەسەر ئەو جۆرە فڕۆكەیە، ئاڵۆزترە.
گۆڤارە ئەمریكییەكە ئەوەشی رونكردوەتەوە، كڕینی SU-57 لەلایەن عیراقەوە تێچویەكی زۆری هەیە و ئەوەش هیچ بیانویەكی نییە، هەروەها ئەگەری هەیە روبەڕوی سزاكانی ئەمریكای بكاتەوە.
