رێكخراوی نەتەوە یەكگرتوەكان ئاشكرایدەكات، لەچەند مانگی رابردودا ڤایرۆسی كۆرۆنا ملیۆنان منداڵی لە جیهاندا لە خوێندن بێبەش كردوە و خوێندنی ئۆنلاینیش لە ناوچەیەكەوە بۆ ناوچەیەكی دیكە جیاوازە لەرووی سود لێوەرگرتنیەوە.
رۆژنامەی “لێپۆینت”ی فەرەنسی بڵاویكردوەتەوە، بەپێی داتاكانی رێكخراوی نەتەوەیەكگرتوەكان، ڤایرۆسی كۆرۆنا لەسەرئاستی جیهان كێشەیەكی بێپێشینەی لە پرۆسەی خوێندندا دروستكردوە و رێژەیەكی زۆر نایەكسانی ئاشكراكرد.
بەپێی راپۆرتێكی رێكخراوی یونیسێفی تایبەت بە منداڵان، ڤایرۆسی كۆرۆنا و داخستنی خوێندنگاكان بوەتەهۆی ئەوەی یەك لەسەر سێی منداڵانی جیهان لە خوێندن بێبەش ببن، ئەوەش واتای 463 ملیۆن منداڵە، چونكە توانای خوێندنی ئۆنلاینیان نییە.
لای خۆیەوە هێنریتا فۆر بەڕێوەبەری جێبەجێكاری یونیسێف دەڵێت “ئەو رەوشەی ئێستا هاتوەتەئاراوە، بۆ چەندین دەیەی داهاتوو كاریگەری لەسەر ئابوری كۆمەڵگەكان دەبێت”.
