نوسەرێكی ئێرلەندی بەناوی پاتریك كۆكبێرن دەڵێت “وتاری سیاسی كۆمارییەكانی ئەمریكا نەتەوەپەرستیی پێوەدیارە”. هەروەك ئەو حزبە بە حزبی بەعسی عیراق و دۆناڵد ترامپ-یش بە سەدام حسێن دەچوێنێت.
پاتریك لە وتارێكدا، كە لە رۆژنامەی “ئیندیپێندێنت” بڵاویكردوەتەوە، باس لەوە دەكات، پیاهەڵدان و بەرزراگرتن كە ئەندامانی كۆنگرەی پارتی كۆمارییەكان پیشانیاندا، لە كۆنگرەی حزبی بەعسی عیراق دەچێت كاتێك بە شان و باڵی سەدام حسێن-دا هەڵیاندەدا و بە رزگاركەر و سەركردە ناویان دەبرد.
ئاماژەی بەوەشداوە، ئەگەر حزبی بەعس حزبێكی نەتەوەیی عەرەبی بێت ئەوا پارتی كۆمارییەكان حزبێكی نەتەوەیی ئەمریكییە، لە هەردوو حاڵەتەكەدا ئەگەر كەسێك گومانی دڵسۆزی بۆ سەركردەی لێ بكرێت، ئەوا دەستبەجێ لادەبرێت و دەگۆڕدرێت بە كەسێكی ناو خێزانەكە.
هەروەها ئەو نوسەرە ئێرلەندییە پێیوایە، ترامپ هەمان كێشەكانی سەدام حسێنی روبەڕوبوەتەوە، هەروەك بەهەمان شێوازەكانی ئەو سەركردە روخاوە، ئەو كێشانە چارەسەردەكات.
