رۆژنامەی نیویۆرك تایمزی ئەمریكی ئاشكرایدەكات، بەهۆی داڕمانی نرخی دراوەكەیەوە، لە ماوەی كەمتر لە دوو ساڵدا توركیا روبەڕوی روخانێكی ئابوری سەخت دەبێتەوە.
نیویۆرك تایمز لە راپۆرتێكدا بڵاویكردوەتەوە، دابەزینی نرخی لیرەی توركی بەرانبەر دۆلاری ئەمریكی دەبێتەهۆی ئەوەی ئەنقەرە روبەڕوی روخانێكی ئابوری سەخت ببێتەوە، بەتایبەتی كە لە چەند رۆژی رابردودا ڤایرۆسی كۆرۆنا لەو وڵاتە دەستیكردوەتەوە بە بڵاوبونەوە بەشێوەیەك كە جێی نیگەرانییە.
رۆژنامەكە باسی لەوەشكردوە، جوڵە سیاسییە دەرەكییەكانی توركیا كاریگەری لەسەر هێزی ئابورییەكەی هەبوە، بەتایبەتی كێشەكانی لەگەڵ فەرەنسا و یۆنان لە دەریای ناوەڕاستدا.
نیویۆرك تایمز لەزاری چاودێرانی سیاسییەوە ئاماژەی بەوەكردوە، جوڵەكانی رەجەب تەیب ئەردۆغان سەرۆكی ئەو وڵاتە و هەڵگیرساندنی ململانێ و جوڵاندنی هەستی نەتەوایەتی بۆ سەرقاڵكردن و راكێشانی بیركردنەوەی هاووڵاتیانیەتی لە كێشە داراییەكانی ناوخۆ، بەتایبەتی كە بەهۆی لەدەستدانی كۆنترۆڵا بەسەر ئیدارەی شارەوانی ئیستانبوڵدا دەسەڵاتی ئەردۆغان لەرزی.
