هومام تەمیمی ئەندامی لیژنەی نەوت و غازی پەرلەمانی عیراق دەڵێت “هەرێمی كوردستان یاداشتێكی لێكتێگەیشتنی لەگەڵ توركیا واژۆكردوە بۆ هەناردەكردنی غازی سروشتی، لەكاتێكدا عیراق خۆی غاز دەكڕێت، ئەوەش تێپەڕبێت هەڵوێستی توندمان دەبێت”.
هومام تەمیمی رایگەیاندوە، وەزارەتی سامانە سروشتیەكانی هەرێم پێشتر لەگەڵ كۆمپانیای “هیلال”ی ئیماراتی گرێبەستی واژۆكردوە بۆ بەرهەمهێنانی غازی سروشتی لە هەرێم، ئێستا ئەو كۆمپانیایە یاداشتێكی لێكتێگەیشتنی لەگەڵ توركیا واژۆكردوە بۆ هەناردەكردنی غازی هەرێم.
رونیشیكردوەتەوە، ئەو هەنگاوە دزینی ئاشكرای سەروەت و سامانی گەلی عیراق و بەهەدەردانی سامانی وڵاتە، لەكاتێكدا عیراق غازی سروشتی هاوردە دەكات، بەڵام هەرێمی كوردستان هەناردەی دەكات.
ئەو پەرلەمانتارەی شیعەكانی عیراق تەئكیدیشدەكاتەوە، ئەو هەنگاوە نایاساییە و پێیانوایە بە ئاگاداری مستەفا كازمی سەرۆك وەزیرانی عیراق كراوە، بۆیە ئەگەر جوڵە نەكات بۆ وەستاندنی ئەو پێشێلكاریە، ئەوا لەناو پەرلەماندا هەڵوێستی توندیان دەبێت.
