لهگهڵ دیدار و كۆبونهوهكانی لهگهڵ بهرپرسانی ههرێم له ههولێر، بڕیاره مستهفا كازمی سهرۆك وهزیرانی عیراق سهردانی دهۆك و سلێمانی و ههڵهبجهش بكات و به مهیدانی ههندێك شوێن بهسهردهكاتهوه.
بهیانی ئهمڕۆ لهگهڵ گهیشتنی به ههولێر، مستهفا كازمی سهرۆك وهزیران و مهسعود بارزانی سهرۆكی پارتی دیداریان ئهنجامدا و پاشانیش لهگهڵ سهرۆك وهزیرانی عیراق كۆبونهوهی لهگهڵ مهسرور بارزانی سهرۆكی حكومهتی ههرێم دهستپێكرد.
لهبارهی سهردانهكهشهوه، زانیاری ئهوه بڵاوكراوهتهوه، كه مستهفا كازمی سهردانی دهۆك، سلێمانی و ههڵهبجهش دهكات و ههردوو دهروازهی سنوریی ئیبراهیم خهلیل له زاخۆ و باشماخ له پێنجوێن بهسهردهكاتهوه.
لهوهتهی مستهفا كازمی بۆته سهرۆك وهزیرانی عیراق، ئهوه یهكهم سهردانێتی بۆ ههرێمی كوردستان ئهنجامیدهدات و جیاواز له سهرۆك وهزیرهكانی پێشو، ههر دیدار لهگهڵ بهرپرسانی حزبی و حكومی ئهنجامنادات، بهڵكو به مهیدانی ههندێك شوێن بهسهردهكاتهوه.
ههر لهو چوارچێوهیهدا، بهپێی بهرنامهی كارهكهی، كازمی سهردانی كامپێكی كوردانی ئێزدی دهكات و دواتر دهچێته یهكێك لهو گوندانهی له سنوری ئامێدی، كه دهوڵهتی توركیا بۆردومانی كردوه و زیانێكی زۆری گیانی و مادی لێكهوتوهتهوه.
بەختیار شاوەیس پەرلەمانتاری عیراق لەبارەی سەردانەكانی ئەمڕۆی مستەفا كازمی سەرۆك وەزیران بۆ ناوەندەكانی تاقیكردنەوە لە بەغدا و هاتنی بۆ هەرێمی كوردستان دەڵێت “كازمی لەم جوڵانەی دەیەوێت بڵێ، كە دەوڵەت و خەڵك لەپشتی لاپتۆپی كۆمپیوتەرەكەت بەڕێوەنابرێت”.
ئەو پەرلەمانتارە كوردە لە پەیجی خۆی لە فەیسبوك نوسیویەتی “مستەفا كازمی سەرۆك وەزیرانی عیراق بڕیارە هەریەك لە پارێزگاكانی سلێمانی و دهۆكیش بەسەربكاتەوە و سەردانی خاڵە سنورییەكانی ئیبراهیم خەلیل و باشماخ بكات. وەك چۆن لەماوەی رابردو خاڵە سنورییەكانی پارێزگاكانی ناوەڕاست و باشوری بەشێوەیەكی مەیدانی بەسەركردەوە و داهاتەكانیانی رێكخستەوە، بەوەش رۆژانە چەندین ملیۆن دۆلاری بۆ داهاتی دەوڵەت گەڕاندەوە و لە چنگی میلیشیا گەندەڵەكانی دەرهێنا”.
هەروەها دەڵێت “ئەوەی جێگەی سەرنجە لەنێوان كاتژمێر 8 بۆ 9ی بەیانی، كازمی هۆڵەكانی تاقیكردنەوەی خوێندكارانی لە خوێندنەگەی مەنسوڕ و ئامادەیی كچانی بەغدا بەسەركردوەتەوە و لە نزیكەوە لە رەوشی خۆپارێزی هۆڵەكان و تەندروستی خوێندكاران و چۆنیەتی بەڕێوەچونی تاقیكردنەوەكانی كۆڵیوەتەوە”.
بەوتەی ئەو پەرلەمانتارەی عیراق، لە یەك رۆژدا، كازمی لە پەروەردە بوە و بۆ چارەسەری كێشەی سیاسی و دارایی و دەستوری-یش، لەنێوان بەغدا و هەولێر و سلێمانی و دهۆكدا دەبێت، هەربۆیە دەیەوێت پەیامێكی جیاواز بداتە ناوخۆی عیراق و جیهانی دەرەوە.
بەختیار شاوەیس دەشڵێت “بەهیچ شێوەیەك لەگەڵ بەپاڵەوانكردنی هیچ كەسێك نیم، بەڵام ئەم هەنگاوانە جێگەی بەهەند وەرگرتنن و دەبێت پەلەنەكەین لەسەر كازمی بۆ بڕیاردانی كۆتایی، چونكە زۆرمان دی و ئەوە دەرنەچون..كازمی لەم جوڵانەی دەیەوێت بڵێ، كە دەوڵەت و خەڵك لە پشتی كۆمپیوتەرەكەت بەڕێوە نابرێ، دەبێت لەناخی خوارەوەی ئازارەكانی میللەتەكەت بژیت، جا ئەگەر ئەو ئازارە لەناو هۆڵێكی تاقیكردنەوەی خوێندكاران یان خاڵێكی گومركی بێت لەوپەڕی سنوری وڵات”.
