مستەفا كازمی لە كۆبونەوەیدا لەگەڵ مەسعود بارزانی دوپاتیكردووەتەوە، هەرێمی كوردستان بەشێكی سەرەكیی عیراقە و گفتوگۆی هەردوولا لەسەر بنەمای دەستور، داهاتوێكی گەش و سەقامگیر فەراهەم دەكات.
دوای ئەوەی ئەمڕۆ پێنجشەممە مستەفا كازمی سەرۆك وەزیرانی عیراق سەردانی مەسعود بارزانی سەرۆكی پارتی دیموكراتی كوردستانی كرد و كۆبونەوە، نوسینگەی راگەیاندنی كازمی، بەیاننامەیەكی لەبارەی كۆبوونەوەكە بڵاوكردەوە، راگەیەندراوە، لەكۆبوونەوەكەدا گفتوگۆ لەبارەی بارودۆخی ئێستای عیراق و هەرێمی كوردستان و هەڵبژاردنی پێشوەختە كراوە، ئەمە جگە لە گرنگیی هەماهەنگیی نێوان هەولێر و بەغدا.
لە كۆبونەوەكەدا دوپاتكراوەتەوە، هەماهەنگیی بەرزی هێزە عیراقییەكان و هێزەكانی پێشمەرگەی كوردستان هۆكاری سەركەوتن بوون بەسەر داعشدا.
بەپێی راگەیەندراوەكەی نوسینگەی راگەیاندنی سەرۆك وەزیرانی عیراق، لە كۆبونەوەكەیدا لەگەڵ بارزانی، كازمی رایگەیاندووە، هەرێمی كوردستان بەشێكی سەرەكیی و تەواوكەری عیراقە و دانوستاندن و گفتوگۆی هەردوولا لەسەر بنەمای دەستور، داهاتوێكی گەش و سەقامگیر بۆ عیراق فەراهەم دەكات.
