هەڤاڵ ئەبوبەكر، پارێزگاری سلێمانی، 26 داواكاری سلێمانی بەڕەسمی پێشكەشی مستەفا كازمی سەرۆك وەزیرانی عێراق كرد كە یەكەمیان دورخستنەوەی موچەو شایستە داراییەكانی هەرێمی كوردستانە لە هەر دۆسیەو ناكۆكییەكی سیاسی.
هەڤاڵ ئەبوبەكر، لەلاپەڕەی خۆی لە فەیسبوك رایگەیاند: رۆژی هەینی بەڕەسمی داواكارییەكانی پارێزگای سلێمانی لە حكومەتی ئیتحادیی عیراق، پێشكەشی مستەفا كازمی سەرۆكوەزیرانی عێراق و وەفدی وەزاریی هاوڕێی كردوەو وەڵامی ئیجابیی بەشێكی زۆری لە داواكارییەكانیان وەرگرتۆتەوە.
داواكارییەكانی پارێزگای سلێمانی كە پێشكەش بە سەرۆك وەزیرانی عێراق كراون و لەلایەن هەڤاڵ ئەبوبەكرەوە بڵاوكراونەتەوە پێكدێن لە 26 داواكاری كە یەكەمیان دابینكرن و خەرجكردنی موچەی موچەخۆران و شایستە داراییەكانی هەرێمی كوردستان و دورخستنەوەیەتی لە هەر دۆسیەو ناكۆكییەكی سیاسی.
هەروەها داوایەكی دیكەی ئەوەیە كە بودجەی پەرەپێدانی پارێزگاكان بۆ پارێزگاكانی هەرێمی كوردستان خەرج بكرێت كە لە 1ی 1ی 2014ەوە خەرجنەكراوە.
هەروەك داواش لە سەرۆك وەزیران كراوە بودجەی پەترۆدۆلار بۆ پارێزگای سلێمانی خەرج بكات كە ئەویش لە 1ی 1ی 2014ەوە خەرج نەكراوە.
داوایەكی دیكەش بریتییە لە تەرخانكردنی بڕی پێویست لە هەمو بەرهەمە نەوتییەكان بەتایبەت نەوتی سپی بۆ پارێزگاكانی هەرێمی كوردستان.
هەروەك داواشكراوە بڕی ئەو بودجەیە خەرج بكرێت كە لە تەرخانكراوەكانی بودجەی ساڵی 2019ی عێراقدا بۆ قەزاكانی سەیدسادق و چەمچەماڵ و قەڵادزی تەرخان كراوەو تا ئێستا خەرج نەكراوە.
