عەلی حەمەساڵح ئەندامی پەرلەمانی كوردستان لە پشكی فراكسیۆنی گۆڕان دەڵێت “حكومەتی هەرێم بەڵێنی داوە ژمارەی ئەو كۆمپانیایانە كەمبكاتەوە، كە پارە لە هاووڵاتیان وەردەگرن، بەڵام زیادیان كردوە و دوو كۆمپانیاش لە بەڕێوەبەرایەتی هاتوچۆی سلێمانی بەناڕەوا رۆژانە لانیكەم 60 ملیۆن دینار لە هاووڵاتیان وەردەگرن”.
ئەو پەرلەمانتارەی گۆڕان لە نوسراوێكدا، كە ئاراستەی سەرۆكایەتی حكومەت و وەزارەتی ناوخۆی هەرێمی كردوە، نوسیویەتی “ئێوە بڕیارتاندابو پێداچونەوە بە گرێبەستی هەموو ئەو كۆمپانیایانەدا بكەن، كە لە خاڵی سنوری و بازگەكان و شارەوانی و دامەزراوەكانی وەزارەتی ناوخۆ لە بری حكومەت پارە لە خەڵك وەردەگرن، بەڵام بەداخەوە لەبری ئەوەی ژمارەی ئەو كۆمپانیانەی بە ناڕەوا پارە وەردەگرن كەمبكات، لەم كابینەیەدا زیاددەكات”.
ئاماژەی بەوەشداوە، لە دوایەمین پێشهاتدا لە بەڕێوەبەرایەتی هاتوچۆی سلێمانی دوو كۆمپانیا دەستبەكاربونیان بۆ دەكرێت لەلایەن وەزارەتی ناوخۆوە، بەلای كەمەوە رۆژانە 60 ملیۆن دینار لە هاووڵاتیانی ئەو شارە وەردەگرن.
سەبارەت بە كاری كۆمپانیاكانیش نوسیویەتی “یەكەم “پشكنینی بەڕاد”ە كە پێشتر ئۆتۆمبیل پشكنینی هەزەی دەكرد، لەگەڵیدا بەبێ بەرانبەر پشكنینی بەڕادی بۆ دەكراو هیچ گرفتێك نەبوو بۆ شۆفێر و بۆ حكومەتیش، بەڵام ئێستا پشكنینی بەڕاد دراوە بە كۆمپانیایەك، دەبێت ئۆتۆمبیل بۆ ئەو پشكنینە رۆتینە بچێتە كەڵەوانان لەوێشەوە 20 خولەك بە جادەی خۆڵدا بچێت و پشكنینێك بە 25 هەزار دینار بكات لای كۆمپانیایەك، رۆژانە نزیكەی هەزار ئۆتۆمبیل ئەو رێگایە ببڕن و هەریەكە 25 هەزار دینار بدەن، تەنیا لەپێناوی قازانجی كۆمپانیایەك و هیچی تر”.
