پارێزگاری هەڵەبجە رەتیدەكاتەوە داوای موچەیان لە بەغدا كردبێت

پارێزگاری هەڵەبجە رەتیدەكاتەوە داوای ئەوەیان لە كازمی كردبێت راستەوخۆ موچەیان لە بەغداوە پێبگات، دەڵێت، داواكارییەكانیان پەیوەندیی بە بەپارێزگاكردنی هەڵەبجە و دابینكردنی بودجە و پرسە خزمەتگوزارییەكانەوە هەبووە.
ئازاد تۆفیق پارێزگاری هەڵەبجە گفتوگۆیەكی لەگەڵ بەشی كوردیی دەنگی ئەمریكا كردووە، باسی سەردانەكەی مستەفا كازمی سەرۆك وەزیرانی عیراقی كردووە بۆ پارێزگاكە، پێی وایە خودی سەردانەكە داننان و ئاماژەیە بۆ بەپارێزگابوونی هەڵەبجە و شایەنی نرخاندنە.
لەبارەی قسەی پەرلەمانتارێكی كوردیش لە بەغدا، كە رایگەیاندبوو، خاڵی سەرەكیی داواكارییەكانی سلێمانی و هەڵەبجە بۆ كازمی ناردنی موچە بووە راستەوخۆ لە بەغداوە، پارێزگاری هەڵەبجە رەتیكردەوە ئەو داوایەیان لە كازمی كردبێت، رایگەیاندووە، ئەو قسەیە دوورە لە راستیەوە، “ئێمە نانی تاڵ دەخۆین و داوای موچە لە كەس ناكەین، لە ‌حكومەتی هەرێمی دەكەین”.
ئازاد تۆفیق دوپاتیكردووەتەوە، داواكارییەكانی ئەوان تایبەت بوون بە بەپارێزگابوونی هەڵەبجە و دابینكردنی بودجە و خزمەتگوزارییەكان و كردنەوەی هەندێك لە فەرمانگە فیدراڵییەكان، ئاشكراشیكردووە، كازمی بانگهێشتی كردون سەردانی بەغدا بكەن بۆ پرسی بەپارێزگاكردنی هەڵەبجە.
بەڵام پارێزگاری هەڵەبجە رەخنەش لە حكومەتی هەرێم دەگرێت، دەڵێت “حكومەتی هەرێم لە نوكی پێیەوە تاسەر ئێسقان كەمتەرخەمە، دەبێت 30 ڕۆژ جارێك موچەی خەڵك بدات، من دەزانم قەیرانی دارایی هەیە و نەوت دادەبەزێت و بودجە لە عێراقەوە نایەت، بەڵام دەبێت 30 ڕۆژ جارێك موچە بدرێت.”

هەواڵی دواتر

بزوتنەوەی گۆڕان: كۆبونەوەیەكی راشكاومان لەگەڵ سەرۆكی هەرێم كردوە

نێچیرڤان بارزانی سەرۆكی هەرێمی كوردستان سەردانی بزوتنەوەی گۆڕانی كردو دوای كۆبونەوە لەگەڵیاندا رایگەیاند: وەڵامدانەوەی لایەنەكان …

وەڵامێک بنووسە

پۆستی ئەلکترۆنیکەت بڵاو ناکرێتەوە .