دەستەی دەستپاکی عێراق رایگەیاند، بەهۆی کەیسی گەندەڵی لە بونیادنانی 25 قوتابخانە لە کەرکووک، گەشتکردنی راکان سەعید، پارێزگاری کەرکووک بەوەکالەت قەدەخەکرا و بانگهێشتی دادگە کرا.
فەرمانگەی لێکۆڵینەوە لە دەستەی دەستپاکی عێراق، ئەمڕۆ سێشەممە 15-09-2020 راگەیێندراوێکی بڵاوکردەوە و دەڵێت “دادگەی تایبەت بە کەیسەکانی گەندەڵی لە کەرکووک، بەپێی ماددەی 340ـی یاسای سزاکان، فەرمانی ئامادەبوونی پارێزگاری کەرکووک و بەڕێوەبەری باڵەخانەکانی قوتابخانەکانی کەرکووک لە پێشی دادگەکە، دەرکرد”.
فەرمانی بانگهێشتکردنی پارێزگاری کەرکووک و بەڕێوەبەری باڵەخانەکانی قوتابخانەکان “بەهۆی بەفیڕۆدانی سامانی گشتییە لە پرۆژەی بونیادنانی ژمارەیەک قوتابخانە، کە پێشتر پارچەکانی دروستکراون، کە درابوونە کۆمپانیایەکی بیانی بە گوژمەی 57ملیار و 894 ملیۆن و دینار، ئەو کەیسە پارێزگاری پێشووی کەرکووکیش دەگرێتەوە”.
فەرمانگەی لێکۆڵینەوە لە دەستەی دەستپاکی عێراق راشیگەیاند، دادگەی تایبەت بە کەیسەکانی گەندەڵی لە کەرکووک، بەهۆی کەیسی قوتابخانەکان، فەرمانی قەدەخەکردنی گەشتکردن و دەستگیرکردنی بۆ 23 فەرمانبەر لە پارێزگای کەرکووک و بەڕێوەبەرایەتی گشتیی پەروەردە دەرکرد.
دەستەی دەستپاکی عێراق لە کۆتایی مانگی ئابی 2020 رایگەیاند، کەیسێکی گەندەڵیمان لە بونیادنانی 25 قوتابخانە لە پارێزگای کەرکووک ئاشکراکرد، کە کۆمپانیایەکی بیانی جێبەجێیانی کردووە و ژمارەی قوتابخانەکانی لە 25 وە بۆ 18 قوتابخانە کەمکردووەتەوە و تەنانەت دیزاین و رووبەری قوتابخانەکانیشی گۆڕیوە، بە پێچەوانەی گرێبەستەکان و بەبێ رەزامەندی وەزارەتی پلاندانان.
