فازڵ میرانی رەوایەتی بە هێرشەكانی توركیا بۆسەر باشوری كوردستان دەدات، دەڵێت، هاتووە مەترسییەكانی پەكەكە لە سنورەكانی دوور بخاتەوە و نەهاتووە موسڵ داگیربكات.
لە گفتوگۆیەكدا لەگەڵ بەشی كوردیی دەنگی ئەمریكا، فازل میرانی سكرتێری مەكتەبی سیاسیی پارتی دیموكراتی كوردستان، سەبارەت بە كۆبونەوەیان لەگەڵ یەكێتی، رایگەیاندووە، هەردوولا دەستەیەكیان دروستكردوە، كە هۆشیار زێباری و بافڵ تاڵەبانی سەرۆكایەتییان دەكەن، ئێستا پەیوەندیەكان و گرفتەكانی پارتی و یەكێتی لەنێوان ئەو دوو لیژنەیەدایە، لە كۆبونەوەكەی دوكانیشیاندا چەند بڕیارێكیان دا، كە پەیوەندیی بە چۆنیەتیی كاری سەرۆكایەتی پەرلەمان و پرسە ستراتیژی و نەتەوەییەكانەوە هەیە، كە بە تەوافق بكرێت.
فازل میرانی دەشڵێت، بۆ كۆبونەوەی فراوانتر “چاوەڕوانی برادەرانی یەكێتی دەكەین”، بەڵام رایگەیاند، بەم زووانە كۆبونەوەی نێوان هەردوو حزبەكە ئەنجامدەدرێت.
سكرتێری مەكتەبی سیاسیی پارتی لەبارەی هێرشەكانی توركیاشەوە بۆسەر باشوری كوردستان، رایگەیاندووە، پەكەكە مەترسیی لەسەر توركیا نەماوە، مەترسی پەكەكە بۆ توركیا لە سوریا و لە عیراقە، دەبێت فەڕەنسا و وڵاتان ئەمە بزانن، كە توركیا نەهاتووە موسڵ بگرێتەوە، توركیا هاتووە مەترسی پەكەكە لە دەرەوەی وڵاتی خۆی لابەرێت، ئێمە نەدەبینە محامی پەكەكە، ناشبینە محامی توركیا، بەڵام ئەمە واقیعە.
