بەرپرسێكی باڵای یەكێتی لەسەر پرسی سوتاندنی گۆیژە و سنەوبەرەكانی تاسڵوجە هاتە دەنگ، دەڵێت، مەرامی كردنیان بە پرۆژە بۆ كۆمپانیای مشەخۆرەكان بەهێزترە لە خزمەتی ئەم شارە.
دوای ئەوەی ڤیدیۆیەك بڵاوكرایەوە و دەردەكەوێت بەشێك لە سنەوبەرەكانی رێگەی تاسڵوجە – سلێمانی دەسوتێن، حاكم قادر حەمەجان ئەندامی ئەنجومەنی باڵای سیاسی و بەرژەوەندیی یەكێتی لە پەیجی خۆی لە فەیسبوك نوسیویەتی “چەند رۆژێك لەمەوبەر شاخی گۆیژە سوتێنرا، كە درەختەكان تەمەنیان زیاتر لە 60 ساڵە، چاوەڕوان بووم لیژنەیەكی پسپۆڕ و بوێر لێی بكۆڵێتەوە و تاوانبارانی بە سزا بگەیەنرێت بەپێی یاسا، كەچی وەك رووداوێكی سادە و ساكار و بێ كاریگەری تێپەڕی”.
حاكم قادر دەشڵێت “سەرقەبران فرۆشرا، پاش ئەویش سنەوبەرەكانی تاسڵوجە سوتێنران، تاوەكو ئێستاش ئیدانە نەكرا، رەنگە مەرامی كردنی بە پرۆژەیەك بۆ كۆمپانیای مشەخۆرەكان، یان بۆ كەسانی كاسەلێس، زۆر بەهێزتر بێت لەوەی خزمەتی ئەم شارە بكرێت”.
بۆیە ئەو بەرپرسەی یەكێتی ترسی ئەوەی هەیە، كە وابڕوات، پاركەكانی دیكەی سلێمانیش دیكەش “بە بەرچاوی ئەم كاربەدەستە بێهەڵوێست و بێدەنگانەوە بسوتێنرێ و.. ناتوانن نقەیەك بكەن”.
پێشتریش عەلی حەمەساڵح پەرلەمانتاری گۆڕان هۆشداریی دابوو لەوەی، چەند بەرپرسێكی باڵا پلانیان هەیە بۆ سوتاندنی ئەو دار سنەوبەرانەی تاسڵوجە تاوەكو بكرێت بە پێشانگەی ئۆتۆمبێل و 100 ملیۆن دۆلار قازانج بەدەستبهێنن.
