توشبوانی ڤایرۆسی كۆرۆنا لە جیهاندا 31 ملیۆنی تێپەڕاند و ژمارەی گیانلەدەستدانیش گەیشتە سەرو 961 هەزار كەس، تائێستا زیاتر لە 22 ملیۆن كەسیش چاكبونەتەوە.
بەپێی داتاكانی ماڵپەڕی جیهانی worldometers ژمارەی توشبوانی كۆرۆنا لە جیهاندا تا نیوەڕۆی رۆژی یەكشەممە 20-9-2020 گەیشتوەتە 31 ملیۆن و هەشت هەزار و 424 توشبو، “ئەمریكا، هیندستان، بەڕازیل، روسیا، پیرۆ، كۆڵۆمبیا، مەكسیك، باشوری ئەفریقا، ئیسپانیا و ئەرجەنتین” زەرەرمەندترین 10 وڵاتی جیهانن.
بەپێی هەمان ئەو داتایانە، تائێستا 961 هەزار و 733 كەس گیانیانلەدەستداوە، هەروەها 22 ملیۆن و 614 هەزار و 778 توشبوش چاكبونەتەوە.
هەرچی عیراقیشە لە ریزبەندی زەرەرمەندترین وڵاتەكانی جیهاندا پلەی 17ی گرتوە، ئەویش بە تۆماركردنی زیاتر لە 315 هەزار توشبو و نزیكەی 8 هەزار و 500 گیانلەدەستدان، هەروەها نزیكەی 250 هەزار لەو توشبوانە چاكبونەتەوە.
ویلایەتە یەكگرتوەكانی ئەمریكا نزیكەی 7 ملیۆن توشبوی تۆماركردوە و دوای ئەویش هیندستان بە نزیكەی 5 ملیۆن و 500 هەزار كەس دێت، هەرچی بەڕازیلە زیاتر لە 4 ملیۆن و 500 هەزار توشبوی هەیە و روسیاش زیاتر لە ملیۆنێك و 100 هەزار كەس، تەنها بەو چوار وڵاتە زیاتر لە 18 ملیۆن توشبویان تۆماركردوە.
