ئەندامێكی ئەو لیژنەیەی ئەنجومەنی پارێزگای سلێمانی پێكیهێنا بۆ لێكۆڵینەوە لە سوتانی دارسنەوبەرەكان، بە جۆرێك لە گومانەوە دەڵێت، زۆربەی ئەو سنەوبەرانەی سوتێنراون، پشتیان زەویی بەتاڵە.
محەمەد رەسوڵ سەرۆكی لیژنەی خزمەتگوزاری و شارەوانیی ئەنجومەنی پارێزگای سلێمانی، كە ئەندامی لیژنە تایبەتەكەی ئەنجومەنەكەیە و سەردانی ئەو شوێنانەیان كردووە، كە سنەوبەر و سەوزایی تێدا سوتاوە، لەمیانی بەشداریكردنی لە گفتوگۆی “نیو كاژێر”ی رادیۆ نەوا رایگەیاند، زۆربەی ئەو شوێنانەی دارسنەوبەرەكانیان سوتێنراوە، پشتیان زەویی بەتاڵە، بۆیە بەگومانەوە لەو پرسەی روانی.
دوپاتیشیكردەوە، ئەگەر ئەو دارسنەوبەرانە بەمەبەستیش نەسوتێنرابن، خەمساردیی تێدا كراوە، بۆیە رایگەیاند، یاداشتێكیان داوە بە سەرۆكایەتیی ئەنجومەنی پارێزگا، بۆ ئەوەی رۆژی سێشەممە بانگهێشتی هەریەك لە قائیمقامی سلێمانی، سەرۆكی شارەوانییەكانی سلێمانی، راپەڕین و تاسڵوجە، هەروەها بەڕێوەبەری ناحیەی بەكرەجۆ و بەڕێوەبەری پۆلیسی دارستان بكەن.
سەرۆكی لیژنەی خزمەتگوزاری و شارەوانیی ئەنجومەنی پارێزگای سلێمانی لەبارەی سوتانی شاخی گۆیژەشەوە رایگەیاند، گومان هەیە ئەویش هەر بەدەستی ئەنقەست سوتێنرابێت.
