فوئاد حسێن وەزیری دەرەوەی عیراق سەبارەت بە ئاساییكردنەوەی پەیوەندییەكان لەگەڵ ئیسرائیل دەڵێت “عیراق پابەندە بە بڕیارەكانی لوتكەی عەرەبییەوە”، دەشڵێت “كار بۆ بنیادنانی سیاسەتێكی دەرەكی دەكەین، كە لەگەڵ ئێران و ئەمریكاش روون و ئاشكرا دەبێت”.
فوئاد حسێن دوای سەردانەكەی بۆ فەرەنسا لە گفتوگۆیەكدا لەگەڵ كەناڵی “الحرە”ی ئەمریكی سەبارەت بە ئەگەری ئاساییكردنەوەی پەیوەندییەكان لەگەڵ ئیسرائیل ئاماژەی بەوەداوە، بەشێوەیەكی جدی چاودێری روداوەكان دەكرێت، بەڵام عیراق تائێستا پابەندە بە بڕیارەكانی لوتكەی عەرەبییەوە، كە ساڵی 2012 لە بەغدا ئەنجامدرا، ئەوەش هەنگاوێكی هەستیارە و بڕیارەكان لە چوارچێوەیەكی كۆمەڵایەتیدا دەدرێن.
سەبارەت بە پەیوەندییەكانیش لەگەڵ ئێران، وتی “عیراق پشت بە بنەمای باڵانس دەبەستێت لە پەیوەندییەكاندا، بەتایبەتی كە بەرژەوەندی جوگرافی و ئابوری لەگەڵ دەوڵەتانی دراوسێ هەیە لەنێویشیاندا ئێران، بەڵام لەلایەكی دیكەوە بەرژەوەندی ئەمنی و سیاسی لەگەڵ ئەمریكاش هەیە، بۆیە پێویستە پاراستنی پەیوەندیەكان رەنگدانەوەی ناكۆكییەكانی نێوان تاران و واشنتۆن نەبێت”.
وەزیری دەرەوەی عیراق ئاشكراشیكرد، لە ناوەڕاستی مانگی داهاتودا مستەفا كازمی سەردانی فەرەنسا دەكات، بەنیازە بۆ پڕكردنەوەی پێویستییە سەربازییەكانی عیراق چەك لەو وڵاتە بكڕێت، هەروەها چەند پرسێكی ئابوریش تاووتوێ دەكەن، كە پەیوەندیی بە پلانێكی ئابورییەوە هەیە و فەرەنسا رەزامەندیی لەسەر دەربڕیوە و بڕیارە لەرێگەی كۆمپانیاكانی ئەو وڵاتەوە چەند پرۆژەیەك لە عیراق ئەنجامبدرێت.
ئەمە لەكاتێكدا بڕیاربوو كازمی، دوای چونی بۆ ئێران و ئەمریكا، سەردانی سعودیە بكات، بەڵام تا ئێستا وادەی ئەنجامدانی سەردانەكەی بۆ ریاز دیارنییە.
