ترامپ: ئەگەر گوێم لە بۆڵتۆن بگرتایە ئێستا لە جەنگی پێنجەمی جیهاندا دەبوین

دۆناڵد ترامپ سەرۆكی ئەمریكا دەڵێت ”ئەگەر گوێم لەو شێتە (جۆن بۆڵتۆن) بگرتایە، ئەوا ئێستا جەنگی پێنجەمی جیهان روویدەدا”.
ترامپ لە وتارێكی هەڵمەتی هەڵبژاردنی سەرۆكایەتی و لە شاری دایتۆنی ویلایەتی ئۆهایۆوە سەبارەت بە بۆچونەكانی جۆن بۆڵتۆن راوێژكاری پێشووی ئاسایشی نیشتمانیی ئەمریكا، وتی ”ئەگەر گوێم لەو شێتە بگرتایە، ئەوا ئێستا جەنگی پێنجەمی جیهان رویدەدا”.
هەروەها ئاماژەی بەوە كرد، هەڵبژاردنە سەرۆكایەتییەكی سێی تشرینی دووەم لە رووی مێژووی وڵاتەوە گرنگە و سەبارەت بەكاندیدی دیموكراتەكانیش، جۆ بایدن وتی ”ئەگەر بایدن هەڵبژاردنەكە بباتەوە، ئەوا بەرامبەر خراپترین كاندید لە مێژوودا، هەڵبژاردن دەدۆڕێنم”.
سەرۆكی ئەمریكا لە وتارەكەیدا درێژەی دا جەختی لەسەر ئەوەشكردەوە، كە لە سەردەمی ئیدارەكەیدا توانای سەربازیی وڵاتەكەی زیادیكردووە و وتی ”لەئێستادا فڕۆكەی (ئێف 35)مان هەیە. ئێوە ئەوانە نابینن. ئەوانە نهێنین”.
هەروەها دۆناڵد ترامپ جەختیكردەوە بەردەوامن لەسەر بەرەنگاربونەوەی ڤایرۆسی كۆرۆنای نوێ و رایگەیاند ”لە كۆتایی ئەمساڵدا یان لە بەروارێكی نزیكدا، ڤاكسینێكی نایابمان دەبێت. ساڵی داهاتوو ئەو پەتایە لەناودەبەین”.