ئەرشەد ساڵحی پەڕلەمانتاری تورکمانی لەئەنجوومەنی نوێنەران و ئەندامی لیژنەی هەمواکردنەوەی دەستووری عێراق داوادەکات، لەکاتی هەموارکردنەوەی دەستوور، بڕگەیەک زیادبکرێت و تێیدا تورکمانەکان لەپاڵ نەتەوەی عەرەب و کورد وەک نەتەوەیەکی سەرەکی لەعێراق هەژماربکرێن”، ده‌شڵێت:”پێویسته ئەو ناوچانەی تورکمان زۆرینە پێکیدەهێنێت، تەنیا لەلایەن نەتەوەی تورکمانەوە ئیدارە بکرێت”.
ساڵحی لەبەیاننامەیەکدا دەڵێت:”گفتوگۆم لەگەڵ لیژنەی هەموارە دەستوورییەکان کردو تێیدا قسەمان لەسەر ماددەی ١٢٥ دەستور کرد کە تورکمانی وەک کەمینە هەژمارکردووە، بەڵام ئێمە دەمانەوێت بەپێی بڕیاری ئەنجوومەنی نوێنەران لەساڵی ٢٠٢١، تورکمان وەک نەتەوەیەکی سەرەکی لەعێراق هەژماربکرێت و دەستەبەری مافە مەدەنی و سیاسیی و کۆمەڵایەتی و ئیدارییەکانیان بکرێت”.
لەبەشێکی دیكه‌ى بەیاننامەکەی ئەرشەد ساڵحیدا هاتووە “پێشنیازی تورکمانەکان خۆی لەوەدا دەبینێتەوە کە هەموو ئەو ناوچانەی تورکمان زۆرینە پێکدەهێنێت تەنیا لەلایەن نەتەوەی تورکمانەوە ئیدارە بکرێت، لەسەر بنەمای ئەو پێشنیازەش لیژنەکە بڕیاریدا کوشتارگەکەی پردێ (ئاڵتوون کۆپری) بخرێتە ناو پێشەکی دەستوورەوە، ئەوە جگە لەکارەساتەکانی ناوچەی بەشیری زۆرینە تورکمان ئاماژەی پێبکرێت”.
