عەبدولرەحمان جبوری راوێژكاری سەرۆك وەزیرانی عێراق دەڵێت: ولایەتە یەكگرتوەكانی ئەمریكا سود لەو هەڵمەتەكەی مستەفا كازمی سەرۆك وەزیران دەبینێت كە دەستیپێكردوە دژی گەندەڵی، هەڵمەتەكەش بەردەوامە.
عەبدولڕەحمان جبوری لە لێدوانێكی رۆژنامەوانیدا وتویەتی: تەنها بەڵگەكان دەبنە هۆی ئەوەی كەسێك تۆمەتبار بكرێت، لەكاتێكدا كە دەوڵەت بەڵگەی هەیە بۆیە تۆمەتباركردنی هیچ كەسێك بە ئەنقەست نییە و هیچ نیازێكی تر لە پشت بەڕێوەچونی هەڵمەتی بەرەنگاربونەوەی گەندەڵی نییە.
هێمای بۆ ئەوەشكرد: دەوڵەت بە قەیرانی ئابوریدا تێپەڕدەبێت و بە بونی گەندەڵی ئەو داهاتە كەمەشی كە هەیە بۆ مافیاكان دەڕوات، بۆیە نەختینە لەبەردەستدا نییە بۆ بەكارهێنان و بەردەوامی راییكردنی پێداویستیەكانی گەل.
جبوری باسی لەوەشكردوە: بەكارهێنانی كارتی گەندەڵی لەلایەن كازمییەوە دژی ركابەرەكانی و بۆ رازیكردنی گەل دورە لە راستیەوە، ئەگەر سەیری بەرنامە حكومیەكەی بكەینەوە ئەوا دەبینین كە روبەڕوبونەوەی گەندەڵی لە پێشینەی كارەكانیەتی، پێشی وایە ئەگەری هەیە قازانجی ئەمریكای تیابێت بەڵام ئەوە ئامانجی كازمی نییە، بەڵكو بە هۆكاری نیشتمانی ئەو كارە دەكات.
