ئەمەل جەلال هەڵسوڕاو و چالاكوانی بواری مافەكانی ژنان رایگەیاند، بەپێی دوایین راگەیەندراوی پزیشكی دادوەری لە هەرێمی كوردستان، لە سەرەتای ئەمساڵەوە تائێستا 170 حاڵەتی دەستدرێژی سێكسی تۆماركراوە و لێكۆڵینەوەیان تێدا كراوە.
ئەمەل جەلال بۆ دەنگی ئەمریكا وتویەتی: لەنێو قوربانییەكانی دەستدرێژی سێكسیدا، تەمەنەكانی 4 ساڵ بۆ 29 ساڵ هەن و زۆرینەشیان مێینەن.
هۆكاری دروستبونی ئەو حاڵەتانەش، دەگەڕێنێتەوە بۆ چەند خاڵێك، كە پێیوایە رەنگە سەرچاوەیەك بن بۆ دەستدرێژیكردنەسەر منداڵان لەوانە فەرامۆشكردنی منداڵان لەناو خێزانەكانیان و خستنەبەر كار لە ناو بازاڕ و سەر شەقامەكان، هۆكارێكی دیكەشی ئەوانەی لەلایەن خێزانەكان خۆیانەوە روبەڕوی دەستدرێژی دەبنەوە، ئەوانەن كە دایكیان لەدەستداوە یاخود باوەژنیان هەیە و مامەڵەی دروستیان لەگەڵدا ناكرێت.
سەبارەت بە رێكخراوەكانی داكۆكیكار لە مافەكانی منداڵانیش، ئەمەل جەلال دەڵێت “رێكخراوە نێودەوڵەتییەكان و رێكخراوە ناحكومییەكان لەناوخۆی هەرێمی كوردستان بەردەوام لە هەوڵدان و كاریان كردوە بۆ پاراستنی مافەكانی منداڵان لە هەر بارودۆخێكدا بۆ روبەڕوبونەوەی ئەو جۆرە حاڵەتانە”.
