ئەمڕۆ لە پەرلەمانی كوردستان یاداشتی تایبەت بە پرساندنی سەرۆكی حكومەت و جێگرەكەی و وەزیری دارایی دەدرێتە سەرۆكایەتی، پەرلەمانتارێك دەڵێت، سەرەڕای داواكاریی سەرۆكی حكومەت بۆ سازكردنی دانیشتنێكی میوانداری، بەڵام داواكاریی پرساندنەكە وەك خۆی دەمێنێتەوە.
عوسمان كانی كوردەیی ئەندامی پەرلەمانی كوردستان لە فراكسیۆنی كۆمەڵی ئیسلامی، لە لێدوانێكی رۆژنامەوانیدا ئاشكرایكرد، یاداشتی پرساندنی سەرۆكی حكومەت و جێگرەكەی و وەزیری دارایی رێكارە یاساییەكەی تەواوبووە و ئەمڕۆ دەدرێتە سەرۆكایەتیی پەرلەمانی كوردستان بۆ ئەنجامدانی رێكارە یاساییەكان.
لەبارەی داواكاریی مەسرور بارزانی سەرۆكی حكومەت بۆ ئەنجامدانی دانیشتنێكی میوانداری لە پەرلەمانی كوردستان، ئەو پەرلەمانتارەی كۆمەڵی ئیسلامی، سەرەڕای پێشوازیكردن لەو داوایەی سەرۆكی حكومەت، بەڵام دوپاتیكردەوە یاداشتی پرساندنەكە وەك خۆی دەمێنێتەوە و رێكارەكانی دانیشتنی میوانداری جیاوازە لە پرساندن، چونكە لە میوانداریدا سەرۆكی حكومەت پێدەچێت وتارێك پێشكەش بكات و رونكردنەوە بدات، بەڵام لە پرساندندا پرسیار ئاراستە دەكرێت و وەڵامدەدرێتەوە و پێویستە وەڵامەكان بڕواپێهێنەر بن، دواتر بە دەنگی زۆرینە سەندنەوە متمانە یان مانەوە بەڕێوەدەچێت.
