مەنسوڕ بعێجی ئەندامی پەرلەمانی عیراق داوا لە مستەفا كازمی سەرۆك وەزیران دەكات فەرمان بە وەزارەتی دارایی بكات بۆ دابەشكردنی موچە. دەشڵێت “ئەو وەزارەتە زیانی گەورە لە ئابوری وڵات دەدات”.
بعێجی بەیاننامەیەكی بڵاوكردوەتەوە و بە پێویستی دەزانێت حكومەت سنورێك بۆ دواكەوتنی دابەشكردنی موچەی فەرمانبەرانی دەوڵەت دابنێت و رێگە نەدا بە دواكەوتنی بە هەر هۆكارێك بێت، چونكە ئەوە مافێكی سروشتی فەرمانبەرانە و دواكەوتنی زوڵمێكی گەورەیە و ناكرێت لێی بێدەنگ بن.
باسی لەوەشكردوە، بەهۆی ئەوەی گەورەترین دەسەڵاتی یاسادانانن، بۆیە دواكەوتنی موچە قبوڵ ناكەن و لەسەر حكومەت پێویستە كاری خۆی بە باشترین شێوە ئەنجامبدات، دەشڵێت “پێویستە سەرۆك وەزیران فەرمان بە وەزارەتی دارایی بكات بۆ دابەشكردنی موچە، چونكە دواكەوتنی زیانی ئابوریی گەورەی لێدەكەوێتەوە”.
ئەو پەرلەمانتارە تەئكیدیشی كردوەتەوە، نەبونی پارەی نەختینە بیانو نییە بەتایبەتی، كە لایەنە تایبەتمەندەكان ئاشكرایانكردوە پارە هەیە بۆ دابەشكردنی موچە و پرسیارەكە ئەوەیە بۆچی دابەشناكرێت؟.
ئەوەش لەكاتێكدایە پێشتر بانكی ناوەندی عیراق ئاشكرایكرد، پارەی نەختینە بۆ دابەشكردنی موچەی ئەم مانگە و مانگەكانی داهاتوش لە حسابی وەزارەتی دارایی لە بانكی ناوەندیدا هەیە و ئامادەن بۆ دابەشكردنی.
لەلایەن خۆیەوە وەزارەتی دارایی عیراق تەئكیددەكاتەوە، پابەندن بە سەرجەم بەڵێنە حكومیەكانەوە لەكاتی خۆیدا و لەسەرو هەموشیانەوە دابینكردنی موچەی فەرمانبەران و خانەنشینان و چاودێری كۆمەڵایەتی، لەئێستادا وەزارەت سەرقاڵی نەخشەڕێگایەكە بۆ دابینكردنی خەرجییە سەرەكییەكانی ئەو سێ مانگەی ساڵی 2020، كە ماوە.
