بەرهەم ساڵح سەرۆك كۆماری عیراق لە كۆشكی سەلام لە بەغدا، میوانداری كۆبوونەوەی سەرۆكایەتییەكانی عیراقی كرد و هەر سێ سەرۆكایەتییەكە جەختیان لە پاراستنی نێردە دیپلۆماتییەكان كردەوە.
لە كۆبونەوەكەدا، كە هەریەك لە بەرهەم ساڵح، محەمەد حەلبوسی سەرۆكی پەرلەمان، مستەفا كازمی سەرۆك وەزیران و فایەق زێدان سەرۆكی ئەنجومەنی باڵای دادوەری ئامادەیبون، دوایین پێشهاتە ئەمنی و سیاسی و لێكەوتە مەترسیدارەكانی بۆسەر عیراق تاووتوێكران.
لەوبارەیەشەوە نوسینگەی راگەیاندنی سەرۆكایەتی كۆماری عیراق راگەیەندراوێكی بڵاوكردەوە و ئاماژەی بەوەكردوە، لە كۆبوونەوەكەدا جەخت كراوەتەوە لەوەی پەرەسەندنە ئەمنییەكانی ئەمدواییە و بەئامانجگرتنی بنكە و بارەگا مەدەنی و سەربازییەكان و بەردەوامی تیرۆر و رفاندنی چالاكوانە مەدەنییەكان، مەبەست لێی بەئامانجگرتنی عیراق و سەروەریی خاكەكەی و پڕۆژە نیشتمانییەكەیەتی، كە حكومەتی ئێستای عیراقی لەسەر دامەزراوە بۆ بەدیهێنانی سەقامگیری و پاراستنی شكۆی دەوڵەت و رێخۆشكردن بۆ ئەنجامدانی هەڵبژاردنێكی پێشوەختەی دادپەروەرانە، ئەمە جگە لەوەی زیان بە ناو و ناوبانگی عیراق و پەیوەندییە دەرەكییەكانی دەگەیەنێت.
هەروەها ئامادەبوانی كۆبونەوەكە ئاماژەیان بەوەداوە، بەردەوامی پشێوییە ئەمنییەكان و لێكەوتەكانی، زیانێكی گەورە بە ئابوری عیراق دەگەیەنێت، كە لە هەوڵدایە تەنگژە داراییەكەی ئێستا تێپەڕێنێت.
سەرۆكایەتییەكانی عیراق جەختیانكردوەتەوە، وڵات لە حاڵەتی جەنگدا نییە، جاڕدانی جەنگیش تەنها لە دەسەڵاتی دامەزراوە فەرمییەكانی دەوڵەتدایە، بۆیە هیچ لایەنێك بۆی نییە ئەو بڕیارە بدات.
