نزیكەی 20 ئەندامی ئەنجومەنی پارێزگای سلێمانی كۆبونەوەی ئەمڕۆی ئەنجومەنەكەیان بەهۆی گلەیی لە كارنامەی كۆبونەوە بایكۆتكرد، كە تایبەت بو بە سوتانی دارسنەوبەرەكان، سەرۆكی ئەنجومەنەكەش دوپاتیدەكاتەوە، ئەو كەیسە داناخەن و بەردەوام دەبن لەسەری.
ئازاد محەمەد ئەمین سەرۆكی ئەنجومەنی پارێزگای سلێمانی، دوای ئەوەی نەتوانرا كۆبونەوەكەی ئەمڕۆی ئەنجومەن ئەنجامبدرێت، لە كۆنفرانسێكی رۆژنامەوانیدا ناوەڕۆكی كارنامەی كۆبونەوەكەی ئەمڕۆی خستەڕوو، تیایدا جگە لەوەی داوایانكردبوو پاراستن و خزمەتكردنی سەوزاییەكانی سنوری سلێمانی بخرێتە ئەستۆی شارەوانی و پۆلیسی دارستان و لەماوەی دوو مانگی داهاتووشدا پرۆسەی سەوزكردنەكە كاری تێدا بكرێت، دوپاتیشیكردەوە، كە راپۆرتی لیژنە كاتییەكەی ئەنجومەن تاوتوێدەكرا، كە لەبارەی سنەوبەرە سوتاوەكانەوە ئامادە بوو.
سەرۆكی ئەنجومەنی پارێزگای سلێمانی دوپاتیكردەوە، كۆبونەوەكەی ئەمڕۆ بشكرایە، ئەو كەیسە لە ئەنجومەن دانەدەخرا و بەردەوام دەبوون لە بەدواداچوون و هەر بەرپرسێكیش پێویست بكات، بانگهێشتی ئەنجومەنی دەكەن.
لای خۆیەوە بەرزان محەمەد جێگری سەرۆكی ئەنجومەنی پارێزگای سلێمانی، دوپاتیدەكاتەوە، دوای بەدواداچوونەكانیان بۆیاندەركەوتووە، سنەوبەرەكانی سلێمانی نەك هەر سوتێنراون، بەڵكو وشكیشكراون و بڕدراونەتەوە.
هەر لەو نێوەندەدا رەمەزان نامیق ئەندامی ئەنجومەنی پارێزگای سلێمانی لە كۆنفرانسێكی رۆژنامەوانیدا هۆكاری بایكۆتی كۆبونەوەكەی ئاشكراكرد و رایگەیاند، تائێستا لایەنی بەرپرس و كەمتەرخەم لە سوتانی سنەوبەرەكان دیارینەكراوە، جگە لەوەی داواشكرابوو لایەنە پەیوەندییدارەكان لە كۆبونەوەكەی ئەنجومەنی پارێزگا ئامادەبن بۆ پرساندن و وەڵامدانەوەی پرسیاری ئەندامان، بەڵام لە كارنامەی كۆبونەوەكەدا ئەو داواكارییەش جێبەجێ نەكراوە.
