وەزیری دەرەوەی عیراق دان بە خواستی ئەمریكا بۆ كشاندنەوەی باڵیۆزخانەكەی ئاشكرادەكات

باڵیۆز و نوێنەرانی 25 باڵیۆزخانەی وڵاتان لە عیراق دوای كۆبونەوە لەگەڵ مستەفا كازمی سەرۆك وەزیران بەیاننامەیەكیان دەركرد و هیواخوازن عیراقێكی سەقامگیر و ئارام ببینین، فوئاد حسێن وەزیری دەرەوەی عیراقیش تەئكیددەكاتەوە “كشانەوەی ئەمریكا كاریگەریی گەورەی دەبێت و مەترسیدارە”.
باڵیۆز و نوێنەرانی دیپلۆماسی حكومەتەكانی “ئوسترالیا، كەنەدا، كرواتیا، میسر، یەكێتیی ئەوروپا، فنلەندا، ئەڵمانیا، یۆنان، ئیتاڵیا، ژاپۆن، ئوردن، بەحرەین، سعودیە، كوێت، هۆڵەندا، نەرویج، پۆڵەندا، كۆریا، سڕبیا، ئیسپانیا، سوید، توركیا، بەریتانیا، ویلایەتە یەكگرتوەكانی ئەمریكا و یەمەن” لەگەڵ مستەفا كازمی سەرۆك وەزیرانی عیراق كۆبونەوە، دواتر ئەو وڵاتانە لە بەیاننامەیەكی هاوبەشدا بڵاویانكردوەتەوە، لە كۆبونەوەكەدا پشتگیری خۆیان بۆ عیراق و گەلەكەی و سەروەرییەكەی دوپاتكردوەتەوە و هیوایان وایە عیراقێكی سەقامگیر و ئارام ببینن.
تەئكیدیشیانكردوەتەوە، نیگەرانن لە بەرزبونەوە و فراوانبونی هێرشەكان دژی نێردە دیپلۆماسیەكان لە عیراقدا، لەوانەش هێرشە موشەكییەكان و بۆمبە چێندراوەكان، دەشڵێن “ئەو روداوانە تەنها باڵیۆزخانەی وڵاتان روبەڕوی مەترسی ناكاتەوە، بەڵكو مەترسی هەیە بۆسەر عیراقیەكانیش، وەك هێرشەكەی سەر فڕۆكەخانەی بەغدا، كە ئەندامانی خێزانێكی كردە قوربانی”.
رونیشیانكردوەتەوە، پێشوازییان لە رێوشوێنەكانی كازمی و حكومەتەكەی كردوە بۆ چارەسەركردنی ئەو مەترسیانە، لەوانەش لێكۆڵینەوە و رێنمایی بۆ هێزە ئەمنییەكان و پشتگیریكردنی ئاسایشی فڕۆكەخانەكە، هەروەها پشتگیری رێوشوێنی ئەمنی زیاتر لە بەغدا دەكەن لەوانەش بەهێزكردن و زیادكردنی هێزە ئەمنیەكانی ناوچەی سەوز، وەك هاوڕێ و دۆستی عیراقیش نیازی خۆیان بۆ هاوكاریكردنی بەغدا لە روبەڕوبونەوەی ئاڵنگاریە ئەمنیەكان، دەربڕیوە.
لای خۆیشیەوە نوسینگەی مستەفا كازمی سەرۆك وەزیران سەبارەت بە كۆبونەوەكە بەیاننامەیەكی بڵاوكردوەتەوە و تێیدا ئەوە خراوەتەڕو، سەرۆك وەزیران سوربونی خۆی لەسەر سەروەریی یاسا و هێشتنەوەی چەك بەدەستی دەوڵەت و پاراستنی نێردە دیپلۆماسیەكان دوپاتكردوەتەوە.
لەلایەكی دیكەوە فوئاد حسێن وەزیری دەرەوەی عیراق لە پرێس كۆنفرانسێكدا سەبارەت بە دەنگۆكانی كشانەوەی باڵیۆزخانەی ئەمریكا لە بەغدا، وتی “داخستنی باڵیۆزخانەی ئەمریكا بڕیارێكی هەڵەیە و لە خزمەتی واشنتۆن و بەغدا نییە، رەنگە وڵاتانی دیكەش دوای ئەمریكا، باڵیۆزخانەكانیان دابخەن، بۆیە كشانەوەی ئەمریكا كاریگەریی گەورەی دەبێت و كارێكی مەترسیدارە”.
هێمای بۆ ئەوەشكرد، لەگەڵ لایەنی ئەمریكیدا لە پەیوەندیدان بۆ گۆڕینی بڕیاری داخستنی باڵیۆزخانەكەی، سەرۆك وەزیرانی عیراقیش نوێنەرایەتیەكانی وڵاتانی دڵنیاكردوەتەوە، كە میلیشیاكان چەك دەكات، ئێرانیش دوپاتیكردوەتەوە هیچ پەیوەندییەكی بە گروپە چەكدارەكانی عیراقەوە نییە.