یاریدەدەرێكی وەزیری دەرەوەی ئەمریكا رایگەیاند، وڵاتەكەی چیتر لێبوردە نابێت بەرامبەر بەو هێرشانەی گروپە چەكدارە عیراقیەكانی سەر بە ئێران بۆ سەر بەرژەوەندیەكانی واشنتۆن ئەنجامی دەدەن.
دەیڤید شینكەر یاریدەدەری وەزیری دەرەوەی ئەمریكا بۆ كاروباری رۆژهەڵاتی نزیك راشیگەیاند، چیتر ناتوانن بێدەنگ بن بەرامبەر بەو هێرش و هەڕەشانەی لەسەر هاوڵاتیانیان و ئەو ژن و پیاوانەیان هەیە، كە لە دەرەوەی سنورەكانیان سەرقاڵی خزمەتكردنن.
ئەو بەرپرسەی وەزارەتی دەرەوەی ئەمریكا جەختیشی كردەوە، كە وڵاتەكەی هەوڵ دەدات لەگەڵ هاوبەشە عیراقییەكانی لەپێناو پاراستنی ئاسایش كارمەندن و دامەزراوە ئەمریكیەكان لە عیراق هەماهەنگی چڕی هەبێت.
لەماوەی رابردوودا هێرشەكانی سەر هاوپەیمانان و نێردە دیپلۆماسیەكان لە عیراق رووی لە هەڵكشان كردووە و ئەوەش كاردانەوەی واشنتۆنی لێكەوتوەتەوە و باس لەوەدەكرێت و وەزیری دەرەوەی ئەو وڵاتە هەڕەشەی داخستنی باڵیۆزخانەكەیانی لە بەغدا كردووە.
