ئەندامێكی مەكتەبی سیاسی پارتی دیموكراتی كوردستان ڕایدەگەیەنێت، سەركردەیەكی حەشدی شەعبی لە پشت هێرشە موشەكیەكەی سەر فڕۆكەخانەی هەولێرە و ئەو هێرشەش بەپلەی یەكەم نامەیەك بوو بۆ ئەمریكا و مستەفا كازمی سەرۆك وەزیرانی عیراق و هەوڵێكیشە بۆ یەكلاكردنەوەی كێشەكانی ئەمریكا – ئێران لەسەر خاكی عیراق.
هۆشیار زێباری ئەندامی مەكتەبی سیاسی پارتی دیموكراتی كوردستان بە ڕۆژنامەی “شەرقولئەوسەت”ی ڕاگەیاندوە، وەعد قەدۆ، سەركردە لە حەشدی شەعبی لە پشت هێرشە موشەكییەكەی سەر شاری هەولێرە، چونكە ناوبراو لەلایەن هادی عامری سەرۆكی هاوپەیمانی فەتحەوە پشتگیری دەكرێت و ناویشی لە لیستی تیرۆردایە، چەندین تاوانی لە ناوچەكانی ژێر دەستی لیوای 30 هێزەكانی عیراق ئەنجام داوە و سەرپەرشتی كردوون.
باسی لەوەشكردووە، ئەوەی ڕوویدا هەڕەشەیەكی مەترسیدارە بۆسەر ئاسایشی هەرێمی كوردستان و عیراق، سەركردایەتی هەرێمی كوردستانیش لەو جۆرە سەركێشییە بێ ئەنجامانە بێدەنگ نابێت كە خاوەنەكەی وەهمی ئەوە گرتوویەتی كە گوایە هەوڵدەدەن كاریگەری لەسەر ئەنجامی هەڵبژاردنی سەرۆكایەتی ئەمریكا دابنێن.
وتیشی، ئەو هێرشە لە ماوەی چەند ڕۆژی داهاتوودا گرژی گەورە بەدوای خۆیدا دەهێنێت، بۆیە ئەوە نامەیەكە بۆ ئەمریكیەكان كە، بەوەی پێیان بڵێن شوێنیان لە عێراقدا نییە، ئەوەش سزای بەدوادا دێت بۆ سەر ئەو لایەنانەی تێوەگلاون و لەپشت ئەو سەركێشیەوەن”.
