پارێزگاری نەینەوا رایگەیاند، وردەكاریی ئەوتۆی لەبارەی لێكۆڵینەوەكان لەبەردەست نییە، ئاخۆ مووشەكهاوێژەكان دەستگیركراون یاخود نا؛ پێشیوایە بەرپرسیارێتیی هێرشە مووشەكییەكە لەئەستۆی لیوای 30ی حەشدی شەعبییە؛ ئاماژە بەوەش دەکات، قەرزاری کوردستانن و قبووڵ ناکەن ئازار بدرێت.
نەجم جبووری، پارێزگاری نەینەوا رایگەیاند “وردەكاریی پێویستم لەبارەی لێكۆڵینەوەكان یان دەستگیركردنی مووشەكهاوێژەكان لەلانییە، دوای رووداوەكەش دەستبەجێ فەرماندەی ئۆپەراسیۆنە هاوبەشەكان لیژنەیەكی لێكۆڵینەوەی پێكهێنا، بەڵام تاوەكو ئێستا هیچ زانیارییەكمان لەبارەی ئەنجامی لێكۆڵینەوەكان پێنەگەیشتووە”. سەبارەت بەو لایەنەی لەپاڵ ئەنجامدانی هێرشەكە بووە، نەجم جبووری گوتی “ناتوانم پێش ئەنجامی لێكۆڵینەوەكان بكەوم، بەڵام ئەو دەستدرێژییە لە ناوچەیەك كراوە كە لیوای 30ی حەشدی شەعبی لە ناوچەكەیە، بۆیە بە رای من بەرپرسیارێتیی ئەو هێرشە مووشەكییە لەئەستۆی ئەو لیوایەیە”.
