دكتۆر سامان بەرزنجی وەزیری تەندروستی حكومەتی هەرێمی كوردستان رایدەگەیەنێت، سێ ملیار دیناری دیكە بۆ روبەڕوبوونەوەی ڤایرۆسی كۆرۆنا لەلایەن حكومەتەوە دابینكراوە.
ئەمڕۆ لە كاتی دانانی بەڕێوەبەری نوێی تەندروستی ئیدارەی راپەڕین لە رانیە، د.كتۆر سامان بەرزنجی لە پرێس كۆنفرانسێكدا رایگەیاند، كابینەی نۆیەمی حكومەتی هەرێم بە پەرۆشەوە گرنگی بەكەرتی تەندروستی دەدات و لە پلانیدایە كەرتی گشتیی تەندروستی بەرەوپێشبچێت.
ئاشكراشیكرد، دوو رۆژ لەمەوبەر حكومەتی هەرێم بودجەیەكی دیكەی بە بڕی سێ ملیار دینار بۆ بەرەنگاربوونەوەی كۆرۆنا تەرخانكردوە و وەك خۆئامادەكردن بۆ وەرزی نوێ و گرتنەبەری رێوشوێنی زیاتر بەسەر بەڕێوەبەرایەتییەكانی تەندروستیدا دابەش دەكرێت.
دكتۆر سامان بەرزنجی داواشی لە هاووڵاتیانكرد زیاتر خۆیان بپارێزن و پابەندی رێنماییەكان بن.
هەروەها وتی “بەداخەوە رۆژانە رێژەیەكی زۆر توشبون و گیانلەدەستدان بە كۆرۆنا تۆماردەكرێت، بەشێوەیەك ئێستا رۆژانە 3.7% لە نێو توشبواندا گیانلەدەستدەدەن و كۆی گیانلەدەستدان لەنێو توشبووان گەیشتوەتە سەروو هەزار و 800 كەس، بەڵام خۆشبەختانە 63%ی توشبوان چاكبونەتەوە و 32%ی توشبوانیش لەژێر چارەسەردان، پلان و هەوڵیشمان ئەوەیە رێژەی خێرای توشبون و بڵاوبونەوەی پەتاكە و گیانلەدەستدان كەمبكەینەوە، بەڵام ئەوەش پێویستی بە پابەندیبونی زیاتری هاووڵاتیانەوە هەیە بە رێنماییەكانی خۆپارێزی”.
