ژمارەیەك لە خوێندكارانی زانكۆی سلێمانی خوێندنی ئاوێتە رەتدەكەنەوە و دەیانەوێت بەتەواوەتی خوێندن لە ناو كەمپی زانكۆكان دەستپێبكاتەوە.
ئەمڕۆ خوێندن لە زانكۆكانی هەرێمی كوردستان دەستیپێكردەوە، بەگشتی لە زانكۆكان كار بە سیستمی ئاوێتە دەكرێت، (كە تێكەڵەیەكە لە خوێندنی ناو كەمپی زانكۆ و ئۆنلاین)، بەڵام ژمارەیەك لە خوێندكارانی زانكۆی سلێمانی ئەو سیستمەی خوێندن رەتدەكەنەوە و بەناوی “فێرخوازانی ناڕازی دژ بە سیستمی ئۆنلاین”، بەیاننامەیەكیان بڵاوكردەوە.
ئەو خوێندكارانە پێیانوایە دەتوانن لەناو زانكۆ دەست بە خوێندن بكەنەوە، بۆیە خوێندنی ئاوێتە، رەتدەكەنەوە و دەیانەوێت بەتەواوەتی بچنەوە ناو هۆڵەكانی خوێندن.
خوێندكارەكان چەند هۆكارێكیان بۆ رەتكردنەوەی خوێندنی ئاوێتە دیاریكردووە، لەوانە، گرفتی نەبوونی كەرەستەی پێویست بە خوێندنی ئۆنلاین، لەنمونەی هێڵی ئینتەرنێت و مۆبایل و كۆمپیوتەر، هەروەها نەبوونی سیستمێكی رێكخراو بۆ ئۆنلاین و نەبوونی ئامادەكارییەكی شیاو بۆ سیستمی خوێندنی ئاوێتە، ئەمە جگە لە بوونی جیاوازییەكی زۆر لەنێوان زانكۆ ئەهلی و حكومییەكان، كە خوێندكاران بە زەقكردنەوەی جیاوازیی چینایەتی وەسفیانكرد.
