روسیا نیگەرانە لە زیاتر روونبونەوەی ئەوەی، كە توركیا چەكدارانی سوری دەنێرێتە ئازەرباییجان بۆ بەشداری لەشەڕ دژی ئەرمینیا، كەنەداش ئاڵوگۆڕی بازرگانیی سەربازیی لەگەڵ توركیا راگرت.
دوای ئەوەی بەشار ئەسەد سەرۆكی سوریا رایگەیاند، توركیا و رەجەب تەیب ئەردۆغان چەكدارانی سوری دەگوازنەوە بۆ هەرێمی ناگۆرنی، دیمیتری بیسكۆڤ وتەبێژی كۆشكی سەرۆكایەتیی روسیا (كریملین) رایگەیاند، “ئێمە لەسەر لێدوانەكانی ئەسەد لەبارەی رەجەب تەیب ئەردۆغان رادەوەستین و بە وردی مامەڵە لەگەڵ ئەو لێدوانەی ئەسەد دەكەین، بەوەی ئەردۆغان چەكدارانی گروپە سورییەكان دەنێرێت بۆ ناگۆرنی قەرەباغ بۆ بەشدارییكردن لە شەڕی نێوان ئازەرباییجان و ئەرمینیا”.
بەشار ئەسەد، لە گفتوگۆیەكیدا لەگەڵ ئاژانسی نۆڤۆستی-ی روسی، توركیا و رەجەب تەیب ئەردۆغانی بە پشتگیریكردنی گروپە تیرۆریستییەكان لە سوریا و لیبیا تۆمەتبار كردبوو، هەروەها تۆمەتباریكرد بەوەی لەپشت هەڵكشانی ئاڵۆزییەكانی هەرێمی ناگۆرنی قەرەباغە لەنێوان ئەرمینیا و ئازەرباییجان.
هەر لەو نێوەندەدا، كەنەدا ئاڵوگۆڕی بازرگانیی سەربازیی لەگەڵ توركیا راگرت، نیگەرانە لەوەی ئەو درۆنانەی بە توركیای فرۆشتووە، لە شەڕی ناگۆرنی قەرەباغ بەكارهاتووە.
فرانسوا فیلیپ شامپەین وەزیری دەرەوەی كەنەدا رایگەیاند، هەناردەكردنی سیستەمی تەكنەلۆژیی تایبەت بە فڕۆكەی بێفڕۆكەوانی بە توركیا راگرت، لێكۆڵینەوەش دەكات لەوەی ئایا ئەو تەكنەلۆژیایە لەلایەن هێزەكانی ئازەربایجان لەدژی ئەرمینیا بەكاردێت، یان نا.
