wazho.net
لە رۆژی مامۆستایانی كوردستاندا، لقی كەركوكی یەكێتیی مامۆستایان دووبارە كۆمەڵێك داواكاریی ئاراستەی حكومەتی هەرێم كرد، سەرەكیترینیان لێنەبڕین و دوانەكەوتنی موچەیە.
لە ساڵیادی دامەزراندنی رێكخراوی پەیوەردەی نێودەوڵەتی (EI)، كە لە رۆژی 5-10-1994 دامەزراوە و یەكەم رێكخراوی نێودەوڵەتیی مامۆستایانە، هەروەها بەبۆنەی رۆژی 6-10، كە ساڵیادی رۆژی مامۆستایانی كوردستانە، لقی كەركوكی یەكێتیی مامۆستایانی كوردستان لە كۆنفرانسێكی رۆژنامەوانیدا دووبارە چەند داواكارییەكی ئاراستەی حكومەتی هەرێم و لایەنە پەیوەندییدارەكان كرد، داوایانكردەوە موچە 30 رۆژ جارێك و بێ لێبڕین دابەشبكرێت، بەپێچەوانەوە ناچارن هەڵوێستی دیكە وەربگرن، هەروەها داوای دووبارە دەستپێكردنەوەی پلەبەرزكردنەوەی مامۆستایانیان كرد، هەروەها وانەبێژان بكرێنە فەرمی و دابمەزرێنرێن.
لقی كەركوكی یەكێتیی مامۆستایان داواشیكردووە، پرس و راوێژ بە یەكێتیی مامۆستایان بكات، بەتایبەت لەم دۆخە هەستیارەی ئێستادا، كە پەتای كۆرۆنا بڵاوبوەتەوە، بەوپێیەی لقی كەركوكی یەكێتییەكە پێی وایە، بڕیاری تاكلایەنە خزمەت ناكات و رەنگە زیانی لێبكەوێتەوە.
