بیل گەیتس دامەزرێنەری كۆمپانیای مایكرۆسۆفت پێشبینی دەكات، لە كۆتایی ساڵی 2021دا وڵاتانی دەوڵەمەندی جیهان بگەڕێنەوە باریی نیمچەئاسایی و تیدروس ئەدهانۆم بەڕێوەبەری گشتی رێكخراوی تەندروستیی جیهانیش پێی وایە، تا كۆتایی هەمان ساڵ دوو ملیار ڤاكسین بەردەست دەبێت.
بیل گەیتس بە رۆژنامەی “وۆڵ ستریت جۆرناڵ”ی ئەمریكی وتوە “تا كۆتایی ساڵی داهاتو بارودۆخەكە لە وڵاتانی دەوڵەمەنددا بەرەو نیمچە ئاسایی دەچێت، تائێستاش نازانین ڤاكسینەكانی دژە كۆرۆنا سەركەوتو دەبن یاخود نا”.
هەروەها پێیوایە ئێستا زیادكردنی تواناكانی بەرهەمهێنانی ڤاكسینەكە پێویستی بە كاتە و دواتر دابەشكردنی لەناو ویلایەتە یەكگرتوەكانی ئەمریكا و پاشان لەنێوان ئەمریكا و وڵاتانی دیكە دەبێتە خاڵی ناكۆكی سەرەكی.
لەلایەكی ترەوە تیدروس ئەدهانۆم بەڕێوەبەری گشتی رێكخراوی تەندروستیی جیهانی ئاشكرایكرد، 9 ڤاكسین لەژێر تاقیكردنەوەدان لە چوارچێوەی دەستپێشخەری “كوفاكس” كە رێكخراوەكەیان بەڕێوەی دەبات، ئامانجەكەش ئەوەیە تا كۆتایی ساڵی 2021 دوو ملیار ڤاكسین دابەشبكرێت.
