جەمال كۆچەر ئەندامی لیژنەی دارایی پەرلەمانی عیراق ئاشكرایكرد، موچەی سێ مانگی داهاتوی فەرمانبەران مسۆگەركراوە، رەتیشیدەكەنەوە حكومەت پەنا بۆ قەرزی دیكە ببات بەبێ بونی چاكسازی راستەقینە.
جەمال كۆچەر بە ئاژانسی هەواڵی “عیراقییە”ی وتوە “موچە بۆ سێ مانگی داهاتو مسۆگەركراوە و ئەو دواكەوتنەی رویدا دوبارەنابێتەوە، بەتایبەتی دوای دڵنیاییەكانی سەرۆك وەزیران.
وتیشی “مسۆگەركردنی موچە واتای سەقامگیری ئابوریی هەر خێزانێك، چونكە 8 ملیۆن خێزان راستەوخۆ لە موچە سودمەندن جا فەرمانبەران بن یاخود خانەنشینان یاخود ئەوانەی موچەی چاودێری كۆمەڵایەتی و هەر جۆرە موچەیەكی دیكەیان هەیە، یاخود كەرتی تایبەت و بازاڕ و بازرگانەكان”.
هەرچی سەبارەت بە قەرزكردنیشە، جەمال كۆچەر باسی لەوەكردوە، وەزیری دارایی مافی خۆیەتی داواكاری بۆ قەرزكردن پێشكەش بكات، بەڵام پەرلەمان ئامادەنییە بەردەوام بێت لە رێگەدان بە قەرزكردن تا چاكسازی راستەقینە نەكرێت، چونكە بەردەوامی لە قەرزكردن واتای چونی وڵاتە بەرەو داڕوخان.
لەلایەن خۆیەوە یونادەم یوسف كنا ئەندامی پەرلەمانی عیراق لەسەر پشكی فراكسیۆنی رافیدەین دەڵێت “پەرلەمان رێگە بە حكومەت نادات موچەی فەرمانبەرانی دەوڵەت كەمبكاتەوە و سەرۆك وەزیران و وەزیری دارایی-ش بەرپرسیارێتی تەواوی قەیرانی موچە هەڵدەگرن”.
یونادەم كنا لە لێدوانێكی رۆژنامەوانیدا وتویەتی “رادەستكردنی موچەی تەواوی فەرمانبەران لە ئەركەكانی حكومەتی مستەفا كازمی سەرۆك وەزیرانە و چاكەیەك نییە بیكات وەك ئەوەی پڕوپاگەندەی بۆ دەكات”.
وتیشی “ناكرێت حكومەت بەردەوام بێت لە دواخستنی دابەشكردنی موچە بەهۆی ناكۆكییەكانی لەگەڵ پەرلەمان، هەرگیز پەرلەمان رێگە بە كەمكردنەوەی موچە نادات لەژێر هیچ بارودۆخێكدا، چونكە موچە بە یاسا رێكخراوە و ناتوانرێت دەستی بۆ ببردرێت و دەبێتەهۆی زیادبونی رێژەی هەژاری لە عیراقدا”.
