ریاز عەبدولئەمیر بەڕێوەبەری گشتی لە وەزارەتی تەندروستیی عیراق دەڵێت “گەڕاندنەوەی قەدەغەی هاتوچۆ بۆ كۆنترۆڵكردنی پەتای كۆرۆنا سودی نییە، چونكە هاووڵاتیان پابەندنابن”.
عیراق لە ریزبەندیی وڵاتانی توشبو بە ڤایرۆسی كۆرۆنا گەیشتوەتە پلەی پانزەیەمین و 400 هەزار و 124 توشبوی بە فەرمی تۆماركردوە، كە 332 هەزار و 330یان چاكبونەتەوە، بەڵام 9 هەزار و 790 گیانلەدەستدانیش هەبوە.
هەرچەندە داواكاری گەڕانەوەی قەدەغەی هاتوچۆ و كەرەنتین زیادی كردوە، بەڵام ریاز عەبدولئەمیر بەڕێوەبەری گشتیی تەندروستی لە وەزارەتی تەندروستیی عیراق لەلێدوانێكی رۆژنامەوانیدا باسی لەوەكردوە، گەڕاندنەوەی قەدەغەی هاتوچۆ سودی نییە و شكستی سەلمێنرا، چونكە پابەندبون نییە پێوەی.
هێمای بۆ ئەوەشكردوە، گەڕاندنەوەی دوبارە بڵاوبونەوەی كۆرۆنا لە ژمارەیەك لە دەوڵەتانی عەرەبی و بیانی و دراوسێ بەهۆی شەپۆلێكی نوێی ڤایرۆسەكەیە، زیادبونی ژمارەی گیانلەدەستدانیش لە ئەوروپا ئاماژەیەكی مەترەسیدارە بۆ هاتنی شەپۆلێكی وەرزیی نوێ و چارەسەریش پابەندبونە بە رێوشوێنەكانی خۆپاراستن بەتایبەتی دوركەوتنەوەی كۆمەڵایەتی، هەروەها تەنها 20%ی عیراقییەكان دەمامك دەبەستن.
ئەو بەرپرسەی وەزارەتی تەندروستیی عیراق جەختیشدەكاتەوە، وەزارەتەكەیان ئامادەیە روبەڕوی پەتاكە ببێتەوە لە رێگەی زیادكردنی قەرەوێڵەی تایبەت بە توشبوان بۆ 9 هەزار قەرەوێڵە و دابینكردنی ئامێری هەناسەدانی دەستكرد و پێداویستییەكانی چارەسەر، هەروەها زیاتر لە 50 تاقیگە لە وڵاتدا كاردەكەن بۆ ئاشكراكردنی هەڵگرانی ڤایرۆسەكە.
