ئەحمەدی حاجی رەشید ئەندامی لیژنەی دارایی و ئابوریی پەرلەمانی عێراق هۆشداری دەدات لە هەرەسی ئابوریی بەهۆی زیادبونی قەرز و كەمبونەوەی یەدەگ.
لەئێستادا عیراق لە قەیرانێكی ئابوریی سەختدایە و بۆ پڕكردنەوەی كورتهێنان بەتایبەتی بۆ دابینكردنی موچەی فەرمانبەرانی، پەنای بردوەتەبەر قەرز.
لەوبارەیەوە ئەحمەدی حاجی رەشید لە پەیجی خۆی لە فەیسبوك نوسیویەتی “وەزیری دارایی عیراق لە مانگی 6ی ساڵی 2020دا بڕی 15 تریلیۆن دینار قەرزی كردوە و لەم یاسا تازەیەشدا بەناوی یاسای تەمویلی كورتهێنانەوە داوای 41 تریلیۆنی دیكە قەرز دەكات، واتە كۆی گشتی 56 تریلیۆن دینار دەكات”.
رونیشیكردوەتەوە، زۆربەی ئەو قەرزە لە یەدەك رادەكێشن، ئەگەر بێتو ئەو یاسایە تێپەڕێت و قەرزەكەش بكرێت، ئەوا یەدەكی نەختینەی عیراق شتێكی ئەوتۆی تێدا نامێنێت، عیراقیش دورنابێت لە هەرەسی ئابوری.
