حەسۆ ئیبراهیم سەرۆكی ئەنجومەنی خۆبەڕێوەبەریی دیموكراتیی شنگال دەڵێت “رێككەوتنی بەغدا و هەرێمی كوردستان سەبارەت بە قەزای شنگال رەتدەكەینەوە، ئەگەر هێرشیش بكرێتەسەرمان، هێز بەكاردەهێنین”.
حەسۆ ئیبراهیم بە رادیۆی سەوای وتوە “چەكدارانی هێزەكانی پاراستنی شنگال خەڵكی ناوچەكەن و موچە لە بەغداوە وەردەگرن، ئەنجومەنی خۆبەڕێوەبەرییش سەربە پارتی كرێكارانی كوردستان (پەكەكە) نییە”.
رونیشیكردوەتەوە، ئەنجومەنەكەیان رێگای ئاشتی دەگرێتەبەر بۆ ناڕەزایی دەربڕین لەسەر رێككەوتنەكە، ئەوەش بە رێكخستنی خۆپیشاندان و چالاكی و شێوازەكانی دیكە ناڕەزایی دەردەبڕن، بەڵام هێرشیان بكرێتەسەر، ئەوانیش هێز بەكاردەهێنن.
سەرۆكی ئەنجومەنی خۆبەڕێوەبەریی دیموكراتیی شنگال رەتیشیكردەوە هێزەكانی پێشمەرگە لە ناوچەكەیاندا هەبێت و وتی “ساڵی 2014 هێزە كوردییەكان لە قەزاكە كشانەوە و بۆ داعشیان جێهێشت بەبێ ئەوەی بەرگری لە هاووڵاتیان بكەن”.
حەسۆ ئیبراهیم ئامادەییشی دەربڕی بۆ گفتوگۆ و دانوستان بەمەرجێك ئەگەر دانیشتوانی شنگال تێیدا بەشداربن.
