پەكەكە رەتیدەكاتەوە دەستی هەبێت لە سوتانی دارستانەكانی هاتای، دەڵێت، ئەوانە لە بەرگریدا پێویستیان بە دارستانە و خەباتی ژینگەیی بەشێك لە تێكۆشانەكانیان.
رۆژی هەینیی رابردوو ئاگر لە دارستانی شارۆچكەیەكی سەر بە پارێزگای هاتای كەوتەوە، دواتر ئاگرەكە شارۆچكەكانی ئارسوز و ئیسكەندەرونی گرتەوە، دواتر بەرپرسانی توركیا پەكەكەیان بە كردنەوەی ئاگرەكە تۆمەتبار كرد و باسیان لە بوونی شایەتحاڵ دەكرد، بەڵام پەكەكە ئەو تۆمەتانە رەتدەكاتەوە.
لە راگەیەندراوێكدا، ناوەندی راگەیاندنی هێزەكانی پاراستنی گەل “هەپەگە”، كە باڵی سەربازیی پەكەكەیە، رایگەیاندووە، “پەكەكە بۆ كۆتاییهێنان بە داگیركاری و تاڵانكردنی كوردستان لەلایەن توركیاوە دەستی بە تێكۆشان كردووە، پێویستە هەموو كەسێك ئەوە بزانێت، كە لەسەر رێبازی سەرۆك ئاپۆ درێژە بە خەباتی دیموكراسی، ژینگەیی و ئازادیی ژن دەدات”.
هەپەگە دوپاتیكردووەتەوە، پەكەكە لە ناوچەكانی وەك هاتای و ئیسكەندەرون، بەمەبەستی بەرگری، پێویستی بە دارستان هەیە، بۆیە دارستان ناسووتێنێت.
