ئەمینداری گشتی یەكگرتووی ئیسلامی كوردستان دەڵێت، كێشە و قەیرانەكانی ئەمڕۆی هەرێم لەئەستۆی حزبەكانی دەسەڵاتە ئەوانیش بێ باكن بەرامبەر هاووڵاتیان، دەشڵێت، بەعەقڵیەتی شاخ حوكمێكی مەدەنی و شارستانی ناكرێت.
سەلاحەدین محەممەد بەهائەدین ئەمینداری گشتی یەكگرتووی ئیسلامی كوردستان لە كۆبونەوەیەكی حزبەكەیدا ڕایگەیاندووە، كێشە و قەیرانەكانی ئەمڕۆی هەرێم لە ئەستۆی حزبەكانی دەسەڵاتە ئەوانیش بێ باكن بەرامبەر هاووڵاتیانی هەرێمی كوردستان، بۆیە بەعەقڵیەتی شاخ حوكمێكی مەدەنی و شارستانی ناكرێت و دەنگی میللەت پارسەنگی بۆ دانەنراوە، بۆیە خەڵك بێزارە لە دەنگدان و هەڵبژاردن.
لەبارەی دۆخی موچەخۆران و لێبڕینی موچەشەوە ڕایگەیاندووە، حزبەكەی هەڵویستی خۆی هەبووە و لەڕێگەی پەیام و بەیاننامە و هەڵوێستی سیاسی فراكسیۆنی یەكگرتوو لە پەڕلەمانی كوردستان ئاشكرا بووە، كە بە نایاسایی حكومەت مووچە و قوتی خەڵكی بڕیوە و نایدات.
ئەمینداری گشتی یەكگرتووی ئیسلامی كوردستان ئاماژەی بۆ ئەوەشكردووە، دۆخێكی ناجێگیری تەندروستی هەیە لە هەرێم و پێویستە هەموو ڕێكارە تەندروستیەكان بۆ خۆپارێزی لە ڤایرۆسی كۆرۆنا بگیرێتە بەر.
