عیماد ئەحمەد ئەندامی سەركردایەتی یەكێتی رایگەیاند، لە 16ی ئۆكتۆبەردا بەشێكی شیعەی عەرەب ماسكی درۆزنانەیان بەرامبەر بە ئەزمونی فیدڕاڵی لە كوردستان داماڵدراو شیعەی عەرەب دەستیان خستە ناو دەستی شۆڤێنی سوننەی عەرەب بۆ دژایەتیكردنی خەڵكی كوردستان.
عیماد ئەحمەد، لە وتارێكدا بە بۆنەی تێپەڕبونی سێ ساڵ بەسەر روداوی 16ی ئۆكتۆبەردا رایگەیاند”لەمێژوی نوێماندا (16) ئۆكتۆبەری ساڵی (2017) دواهەمین كارەسات بو لەلایەن دەسەڵاتدارانی عیراق بەگشتی و لایەنی شیعەی دەسەڵاتدار بە بەتایبەتی بەسەر كوردا هات”.
نوسیویشیەتی، 16ی ئۆكتۆبەر كارەسات و تاوانێك بوو دژ بە میللەتەكەمان، لەم رۆژەدا بەرونی هەڵوێستی راستەقینەی بەشێكی شیعەی عەرەب دەركەوت و ماسكی درۆزنانەیان بەرامبەر بە ئەزمونی فیدڕاڵی لە كوردستان داماڵدرا كە چۆن ئەوان لە سەردەمی حوكمڕانی و دەسەڵاتدا بێ بەڵێن و بێ وەفا دەرچوون و چاكەی كوردو بزوتنەوەكەیان لەبەرچاونەبوو.
ئەو ئەندامەی سەركردایەتی یەكێتی ئاماژەی بەوەشكردووە، “لەڕاستیدا ریفراندۆم مافێكی رەوایەو رێگایەكە بۆ جێبەجێكردنی ئاشتیانەی مافی چارەی خۆنوسین، بەڵام كاتێك بێ رەچاوكردنی تەرازوی هێز و بەبێ گوێدان بە ئامۆژگاری دۆستان و هەرەشەی دوژمنان، وەك كورد تاك لایەنە ریفراندۆمان ئەنجامدا، ئەوا وێڕای ڕەوایەتی مافەكە،و سەروەرییەكی مێژوویی، مللەت دەنگی خۆی گەیاندو دووژمنەكانیش گورزی خۆیاند وەشاندو ستەمی رۆژگاری لێكەوتەوە”.
