وەزیری دەرەوەی سعودیە لەو بڕوایەدایە كە بەهۆی چڕبوونەوەی فشارەكانی ئەمریكاوە دواجار ئێران ناچار دەبێت مل بۆ دانوستان بدات.
فەیسەڵ بن فەرحان وەزیری دەرەوەی سعودیە رایگەیاند، پشتیوانی لە توندتركردنەوەی سزاكانی ئەمریكا بۆ سەر ئێران دەكەن و لەو بڕوایەدان دواجار تاران ناچار دەبێت بچێتە سەر مێزی دانوستان.
وتیشی، بە هۆی سزاكانی ئەمریكاوە لەئێستادا ئێران وەك پێشتر ناتوانێت پشتیوانی لە گروپە توندڕەوەكانی عیراق و سوریا و لوبنان بكات.
جەختیشی كردەوە، كە خوازیارن فشارەكان لەسەر ئێران زیاتر بكرێن بۆ ئەوەی ئەو وڵاتە ناچار بێت بۆ رێككەوتنێكی گشتگیر لەسەر پرسی بەرنامە ئەتۆمی و موشەكیەكەی و دەستوەردانەكانی لە ناوچەكە لەگەڵ ئەمریكا بكەوێتە دانوستانەوە.
