كۆسرەت رەسوڵ عەلی سەرۆكی ئەنجومەنی باڵای سیاسی و بەرژەوەندی یەكێتی داوا لە هاوسەرۆكانی حزبەكەی دەكات رێوشوێنی پێویست بگرنەبەر و كۆتایی بەو كارە نایاساییانە بهێنن، كە لەدەروازە سنورییەكاندا دەكرێن و “بونەتەهۆی خراپبوونی ناوبانگی یەكێتی”.
لە نامەكەی كۆسرەت رەسوڵ عەلی، كە بۆ بافڵ تاڵەبانی و لاهور شێخ جەنگی هاوسەرۆكانی یەكێتی نێردراوە و لە میدیای ناوخۆییدا بڵاوبۆتەوە، ئاماژە بەوەدراوە “كوردستان بە دۆخێكی سەختی ئاووریدا تێدەپەڕێت و ژیان و گوزەرانی هاووڵاتیان لە ئاستێكی زۆر خراپدایە، حكومەتی هەرێمی كوردستانیش ناتوانێت لەكاتی خۆیدا موچە بدات و فەرمانبەران و موچەخۆران لە چاوەڕوانی هاتنی موچەكانیاندان، لەملاشەوە گەندەڵی پەرەی سەندوە و وردە وردە فراوان دەبێت”.
هۆشداری ئەوەش دەدات، بەگوێرەی ئەو دۆكیومێنت و بەڵگانەی رۆژانە بەدەستیان دەگات، لە مەرزەكانی پەروێزخان و باشماخ و چەند شوێنێكی تر كاری نایاسایی زۆر ئەنجامدەدرێت، كە بونەتەهۆی خراپی ناوبانگی یەكێتی و دواجار دژی بەرژەوەندییە باڵاكانی حزبەكە و گەلی كوردستان دەشكێتەوە.
كۆسرەت رەسوڵ عەلی دەشڵێت “لە رێگەی ئەم نامەیەوە ئاگادارتان دەكەینەوە، كە رێوشوێنی پێویست بگرنەبەر و كۆتایی بەو كارە نایاساییانە بهێنن، هەر كەسێك لە هەر پلەو پۆستێكدا بێت، دەبێت لێپرسینەوەی لەگەڵدا بكرێت و سزا بدرێت”.
هەروەك هۆشداری دەدات لە ئەگەری هەنگاو نەهاویشتنی هاوسەرۆكان و رێگری نەكردن لەو كارانە، بەگوێرەی ئەو دەسەڵاتەی لە كۆنگرە پێیاندراوە وەك سەرۆكی ئەنجومەنی باڵای سیاسی و بەرژەوەندی یەكێتی هەنگاوی پێویست دەگرنەبەر.
