په‌رله‌مانى عیراق ئه‌و ده‌نگۆیانه ره‌تده‌كاته‌وه كه باس له‌وه‌ده‌كه‌ن، موچه‌ى مانگانه‌ى په‌رله‌مانتاران ده‌گاته 10 ملیۆن دینار.
بازنه‌ى راگه‌یاندنى په‌رله‌مانى عیراق له‌به‌یاننامه‌یه‌كدا بڵاویكردوه‌ته‌وه، هه‌ندێك ده‌زگاى راگه‌یاندن و له تۆڕه كۆمه‌ڵایه‌تییه‌كانیشدا زانیارى نادروست سه‌باره‌ت به موچه‌ى په‌رله‌مانتاران بڵاوكراوه‌ته‌وه، بۆیه ده‌مانه‌وێت ئه‌وه رونبكه‌ینه‌وه موچه له‌لایه‌ن په‌رله‌مانه‌وه به یاسا دیارى ناكرێت و به بڕیارى ئه‌نجومه‌نى وه‌زیرانه.
رونیشكراوه‌ته‌وه، كۆى گشتى بودجه‌ى په‌رله‌مان له هه‌زار به‌ش، چوار به‌شى بودجه‌ى گشتییه و ئاماده‌ى پێشكه‌شكردنى هه‌ر زانیاریه‌كن، كه تایبه‌ت بێت به كارى په‌رله‌مان، به‌ڵام ئه‌وه‌ى بڵاوكراوه‌ته‌وه له‌باره‌ی موچه ناڕاسته.
پێشتر نه‌بیل موسه‌وى شاره‌زاى ئابوریى عیراق ئاشكرایكردبوو، موچه‌ى په‌رله‌مانتاران 4 ملیۆن دینارى بنه‌ڕه‌تییه و 2 ملیۆن دینار ده‌رماڵه‌یه و 3 ملیۆن دینار نیشته‌جێبون و ده‌رماڵه‌ى بڕوانامه‌ش بۆ دكتۆرا 100% و ماسته‌ر 75% و به‌كالۆریۆس 45% و په‌یمانگا 35% و دواناوه‌ندى 25%-ه، بۆیه موچه‌ى په‌رله‌مانتاران ده‌گاته 10 بۆ 13 ملیۆن دینار.
