37 خزمەتكاری ئاسیایی بە رێگەیەكی زۆر بێبەزەییانە لە هەرێمی كوردستانەوە دزەیان پێدەكرێت بۆ بەغدا و بە نوسینگەكانی خستنەسەركار فرۆشراون.
رۆژنامەی سەباحی نیمچە فەرمی بڵاویكردوەتەوە، دیاردەی بازرگانیكردن بە مرۆڤەوە لەسەر ئاستی عیراق زیادیكردوە و لە چەندین شێواز پێكدێت، وەك بازرگانیكردن بە خزمەتكاری بیانی بەشێوەیەكی نایاسایی و بازرگانیكردن بە ئەندامانی جەستەی مرۆڤ و بازرگانیكردن بە منداڵ و ژنانەوە.
رونیشكراوەتەوە، بەپێی بەیاننامە فەرمیەكان، تۆڕێكی پەیوەست بە دەوڵەتانی دراوسێ و تۆڕێكی تری هەرێمی و بیانی، هەزاران چالاكییان لەو بوارەدا هەیە، لەو چوارچێوەیەدا رێكخراوی “مصیر – چارەنوس” بۆ بەرەنگاربونەوەی بازرگانیكردن بە مرۆڤەوە ئاشكرایكردوە، 37 خزمەتكاری ئاسیایی بە رێگەیەكی زۆر بێبەزەییانە لە هەرێمی كوردستانەوە دزەیان پێكراوەتە بەغدا.
بەپێی زانیارییەكانی رێكخراوەكە، ئەو خزمەتكارانە لەماوەی شەش مانگی رابردودا و لە رێگەی بارهەڵگری گواستنەوەی كاڵاوە دزەیان پێكراوە، سەرجەم خزمەتكارانی بیانی لە سەرتاسەری عێراق لەرێگەی هەرێمی كوردستانەوە بە ڤیزای گەشتیاری و بە هاریكاریی چەند كۆمپانیایەك، كە پێگەكەیان لە ئیماراتە، هاتون و دواتر بەسەر نوسینگەكانی خستنەسەركار لە بەغدا دابەشكراون، هەروەها چەند سەد خزمەتكارێكیش لە رێگەی فڕۆكەخانەی بەغداوە هاتون.
