وەزارەتی گەنجینەی ئەمریكا رایگەیاند، ئیرەج مەسجدی باڵیۆزی ئێران لە عیراقی خستوەتە لیستی سزاكانەوە.
لە راگەیەنراوێكی وەزارەتی گەنجینەی ئەمریكادا هاتووە، ئیرەج مەسجدی فەرماندەیەكی سوپای پاسدارانە و ئەركی ئاراستەكردن و جوڵاندنی ئەو هێزانەی لە ئەستۆیە كە بوونەتە هۆی كوژران و برینداربوونی هێزەكانی ئەمریكا و هاوپەیمانەكانی لە عیراق.
لای خۆیەوە ستیڤ منوچین وەزیری گەنجینەی ئەمریكا باسی لەوەكردبووە، ئێران بە مەبەستی بەرەوپێشبردنی پلانی ناسەقامگیركردنی ناوچەكە، ئەندامانی سوپای قودس وەك باڵیۆز لە وڵاتانی رۆژهەڵاتی ناوەڕاست دیاریدەكات، ئەوەش ئاسایش و سەروەری عیراقی خستوەتە مەترسییەوە.
هاوكات مایك پۆمپیۆ وەزیری دەرەوەی ئەمریكاش لە تویتێكدا رایگەیاندووە، سوپای قودس پارە و داهاتی خەڵكی عیراق بۆ بەرژەوەندی خۆی بەكاردەهێنێت، هەربۆیەش ئیرەج مەسجدی لە فەرماندە باڵاكانی سوپای قودسیان خستوەتە لیستی سزاكانەوە.
