زیا بترۆس، سەرۆكی دەستەی سەربەخۆی مافەكانی مرۆڤ لە هەرێم ئاشكرایكرد، رۆژنامەنوس شێروان شێروانی كە ماوەی زیاتر لە دو هەفتەیە دەستگیركراوە، ئێستا لە ئاسایشی گشتی هەولێرە بەڵام هێشتا نازانن لەسەر چی دەستگیركراوە.
زیا بترۆس، لەمیانی چاوپێكەوتنێكدا لەگەڵ بەشی كوردی دەنگی ئەمریكا سەبارەت بە دەستگیركردنی رۆژنامەنوس شێروان شێروانی، رایگەیاندوە، بەر لە سێ رۆژ هاوسەری ئەو رۆژنامەنوسە لە دەستەكەیان سكاڵای پێشكەش كردوەو لەسەر بنەمای ئەوەش ئەمان نوسراوێكی رەسمیان ئاڕاستەی ئاسایشی گشتی هەولێر كردوە بۆ ئەوەی بزانن چارەنوسی چییە.
هاوسەرەكەی بەدەستەی مافی مرۆڤی وتوە كە نازانن شێروانی لە كوێیەو باسی لەوە كردوە كە رفێندراوە بەڵام بەپێی زانیارییەكانی سەرۆكی دەستەكە، ئەو رۆژنامەنوسە لەلایەن هێزێكی رەسمی ئاسایش و وەزارەتی ناوخۆوە دەستگیركراوەو ئەوەش بە فەرمانی دادوەر.
زیا بترۆس وتویەتی: تا ئێستا كەسوكارەكەی و پارێزەر نەیانتوانیوە چاویان بە ناوبراو بكەوێت كە “بەپێی یاساكان ئەمە هەڵەیە.”
سەرۆكی دەستەی مافی مرۆڤ ئاشكرایكردوە كە دوای ئەوەی پەیوەندی لەگەڵ چەند بەرپرسێكی باڵای ئاسایش كردوە زانیویەتی شێروان شێروانی ئێستا لە ئاسایشی گشتی هەولێر دەستبەسەرە بەڵام پێیان نەوتوە لەسەر چی دەستگیركراوەو چاوەڕێن لەوبارەیەوە زانیارییان بەدەست بگات.
سەرۆكی دەستەی سەربەخۆی مافەكانی مرۆڤ جەختی لەوەكردەوە”ڕەوشی مافەكانی مرۆڤ ڕۆژ بە رۆژ بەرەو خراپتر دەڕوات.” و پێشی وایە “هەتا كاری ڕۆژنامەنوسان و ڕۆژنامەگەری ڕێكنەخرێت بەیاسایەك ئەم بارودۆخە هەرئاوا دەمێنێتەوە…ئێستا بەڕاستی فەوزایە.”
