وەزیری دەرەوەی عیراق دەڵێت، ئەگەر ئەمریكا باڵیۆزخانەكەی لە بەغدا دابخات ئەو هەنگاوە لێكەوتەی سیاسی و ئەمنی بۆ سەر وڵاتەكەی دەبێت.
فوئاد حسێن لە چاوپێكەوتنێكدا لەگەڵ بی بی سی ئاماژەی بەو لێكەوتە سیاسی و ئەمنیانەی داخستنی باڵیۆزخانەی ئەمریكا لە بەغدا نەكردووە، بەڵام پێشتر لە چەند لێدوانێكدا باسی لەوەكردبوو، هەنگاوێكی لەو جۆرە دەبێتە هۆی كشاندنەوەی هێزەكانی هاوپەیمانان لە عیراق، ئەمەش وڵاتەكە لە رووبەڕوبوونەوەی داعش تووشی كێشە دەكات.
وەزیری دەرەوەی عیراق راشیگەیاند، حكومەتی ئێستا هەوڵ دەدات گروپە چەكدارەكان بخاتە ژێر كۆنتڕۆڵی خۆیەوە و دەشیهەوێت لە رێگەی دانوستان و چارەسەری سیاسیەوە پرسی ئەو گروپە چەكدارانە چارەسەر بكات.
فوئاد حسێن دەربارەی هەڵوێستی عیراق لە پرسی مشتومڕی ئێران و ئەمریكا لە بارەی گەڕاندنەوەی سزاكانی نەتەوەیەكگرتوەكان بۆ سەر تاران وتی، ئەو سزایانە پەیوەندیان بە ئێرانەوە هەیە، بەغدا پەیوەندی باشی لەگەڵ هەر دوو لا هەیە و هیوادارن ئەو دوو وڵاتە بە گفتوگۆ كێشەكانیان چارەسەر بكەن.
لەماوەی رابردوودا بە هۆی بەردەوامی هێرشەكانی سەر باڵیۆزخانە و نێردە دیپلۆماسیەكان و بنكەكانی هاوپەیمانان ئەمریكا هەڕەشەی كردبوو، كە باڵیۆزخانەكەی لە عیراق دادەخات.
واشنتۆن گروپە چەكدارییەكانی سەر بە ئێران بە ئەنجامدانی ئەو هێرشانە تۆمەتبار دەكات.
